गाेरखा समाचारदाता
गाेरखा – बेनी–जोमसोम–कोरला खण्डको ट्र्याक खोल्ने कार्य अन्तिम चरणमा पुगेको छ ।
उत्तर दक्षिण व्यापार प्रवद्र्धन गर्ने कालीगण्डकी करिडोर अन्तर्गतको उक्त मार्ग निमाण सम्पन्न भए पछि भारत र चीनलाई जोड्ने त्रिदेशीय मार्ग हुने छ ।
बेनी–कोरलाको १ सय ८६ किलोमिटर लामो सडक खण्ड अन्र्तगत जोमसोम–कोरला खण्डको १४ किलोमिटर ट्र्याक खोल्ने कार्य मात्रै बाँकी रहेको छ ।
बेनी–जोमसोम–कोरला सडक विस्तार आयोजनाका अनुसार जोमसोम–कोरला १ सय १० किलोमिटर खण्डको ३ स्थान गरी जम्मा करिब १४ किलोमिटर ट्र्याक खोल्ने काम मात्र बाँकी छ ।
यो काम असोज भित्र सम्पन्न हुने छ । बेनी–जोमसोम खण्डको ट्र्याक खोल्ने काम भने सम्पन्न भइसकेको छ ।
आयोजनाका इन्जिनियर अश्विनीकुमार यादवका अनुसार जोखिम र ठाडो भीर रहेको ३ स्थानमा ट्रयाक खोल्ने कार्यलाइ तीव्रता दिइएकाे छ । घ्याकर–समरसम्मको ७ किलोमिटर, झो खोला क्षेत्रमा २ किलोमिटर र घमी–चराङ क्षेत्रको ५ किलोमिटर गरी १४ किलोमिटरको ठाडो भीर खन्ने कार्यलाई द्रुत गतिमा अगाडि बढाइएको इन्जिनियर यादवले बताए ।
भौगोलिक विकटता एवं प्रतिकूल मौसमले उक्त खण्डमा १ बषमा ५ महिना मात्रै सडक निर्माण कार्य हुने गरेकाे छ ।
कालोपत्रे छिट्टै
उत्तर दक्षिण व्यापारिक मार्ग आयोजनाका निर्देशक शिव नेपालले बेनीदेखि जोमसोमसम्मको ७६ किलोमिटर खण्ड कालोपत्रे गर्ने कार्य अगाडि बढाइएको बताए । उक्त खण्डमा कालोपत्रे गर्न छुटा छुट्टै ४ प्याकेजमा ठेक्का सम्झौता गरिएको छ ।
असोजसम्ममा कालोपत्रे सक्ने लक्ष्य लिए पनि सडक निर्माणमा २ सय विद्युतीय खम्बा, बेनी बजारमा ४ किलोमिटर खानेपानीको पाइप र कालीगण्डकी प्रसारण लाइनको टावर नहटेसम्म कालेपत्रे सडक निर्माणमा समस्या हुने आयोजनाले जानाकारी दिएकाे छ ।
पश्चिममा पाल्पा, तनहुँ, स्याङ्जा, गुल्मी, बागलुङ, पर्वत हुँदै हिमाली जिल्ला म्याग्दी र मुस्ताङ उक्त करिडोर अन्र्तगत पर्दछ।
करिडोरको कुल लम्बाइ ४ सय ३५ किलोमिटर रहेको छ । पहाडी र हिमाली जिल्ला हुँदै चिनियाँ सीमा जोड्ने बेनी–जोमसोम–कोरलाको लम्बाइ १ सय ८६ किलोमिटर छ । नवलपरासी–बेनीसम्मको खण्डको लम्बाइ २ सय ४९ किलोमिटर छ ।