गाेरखा समाचारदाता
गाेरखा – राष्ट्रिय सडक सञ्जालसँग नजोडिएको हुम्लामा छोटो दूरीका सडकमा ‘रुट परमिट’बिना सवारीसाधन सञ्चालन हुँदै आएका छन् ।
राष्ट्रिय गौरवको कर्णाली करिडोरको हुम्लाअन्तर्गत तीन खण्डमा सवारीसाधन सञ्चालन भए पनि जिल्लामा रुट परमिटबिना सञ्चालन हुँदै आएका छन् ।
जिल्ला प्रशासन कार्यालय हुम्लाले जिल्लाका तीन खण्डमा गुडिरहेका सवारीसाधनमाथि कडा निगरानी गर्ने भएको छ ।
जिल्लाभित्रै छोटो दूरीमा सञ्चालन हुदै आएका सवारीसाधन सञ्चालनका लागि सडक विभागले कुनै पनि खण्डमा रुट परमिट दिएकाे छैन ।
जिल्ला प्रशासन कार्यालय हुम्लाले अबका दिनमा सर्केगाडदेखि सलीसल्लासम्मको ११ किलोमिटर, सिमकोटदेखि खार्पुनाथसम्मको १२ किलोमिटर र चीनको हिल्सा नाकादेखि नाम्खा गाउँपालिकाको ढाँणकेर्मीसम्मको ७४ किलोमिटरमा सवारीसाधन सञ्चालन हुँदै आएका दुई दर्जनभन्दा बढी सवारीसाधनमाथि कडा निगरानी गर्ने जनाएको छ ।
रुट परमिटबिना सवारीसाधन गुडाइनु, मापसे गरी लापारवाहीका काराण सवारी चलाउँदा दुर्घटनाको जोखिम बढी भएकाे भन्दै पसे जाँच, लाइसेन्समा जिल्ला प्रशासन हुम्लाले कडा निगरानी गर्ने प्रमुख जिल्ला अधिकारी विनिता भट्टराईले बताइन ।
गएको असार ३ गते खार्पुनाथ गाउँपालिकाको याङचुबगरको बेडुबिसौनामा जिप दुर्घटनामा परी ११ को मृत्यु हुँदाको विषयमा जिल्ला प्रशासन कार्यालय हुम्ला अन्योलमा रहेको छ ।
जिप दुर्घटना भएको एक महीना बितिसक्दा पनि जिल्ला प्रशासन कार्यालय हुम्ला, स्थानीय सरकार, जिल्लास्थित राजनीतिक दलहरुले जिप दुर्घटनाको विषयमा चासो नदेखाएको पाइएको छ ।
विकेन्द्रीत ग्रामीण पूर्वाधार तथा जीविकोपार्जन सुधार कार्यक्रमले ट्र्याक खोलेको यो सडकमा पनि जिप र ट्र्याक्टर गरी एक दर्जनभन्दा बढी सवारीसाधन सञ्चालनमा छन् । यो सडकमा सवारीसाधन सञ्चालनका लागि अनुमति नदिइएको पाइएको छ ।
तस्विर गुगल