गोरखा समाचारदाता
गोरखा – क्वीक्स कपअन्तर विद्यालय स्तरीय फुटबल प्रतियोगिताको उपाधी द ओल्ड क्यापिटल माध्यामिक विद्यालयले जितेको छ ।
गोरखा बजार स्थित खेलकुद मैदानमा भएको फाइनल खेलमा गोरखा नगरपालिका ४ स्थित सरस्वती माविलाई १-३ गोल अन्तरले हराउदै ओल्ड क्यापिटलले उपाधी उचालेको हो ।
उपाधीसंगै पहिलो भएको उसले नगद १५ हजार सहित ट्रफि, मेडल प्राप्त गरेको छ । त्यस्तै दोस्रो भएको सरस्वती माविले नगद ७ हजार ५ सय सहित मेडल पाएका छन् ।
उनिहरुलाई गोरखा नगरपालिकाका प्रमुख राजनराज पन्त, उप प्रमुख विनाकुमारी श्रेष्ठले पुरस्कार वितरण गरेका हुन् ।
गोरखा जिल्ला फुटबल संघको आयोजनामा साउन १४ गते देखि भएको प्रतियोगितामा पहिलो बनेको ओल्ड क्यापिटलले प्रदेशस्तरीय प्रतियोगितामा सहभागी हुन पाउने भएको संघका उपाध्यक्ष आनन्द गुरुङ (काजी) ले बताए ।
१२ विद्यालयको सहभागीता रहेको प्रतियोगितामा सर्वोत्कृष्ट खेलाडी ओल्ड क्यापिटलकै शिसान्त परियार घोषित भएका छन् ।
संघका अध्यक्ष दिपेन्द्र श्रेष्ठको अध्यक्षतामा भएको समापन एवं पुरस्कार वितरण कार्यक्रममा प्रमुख अतिथी समेत रहेका नगर प्रमुख पन्तले खेलकुद विकासका लागि नगरपालिकाले बिभिन्न योजना ल्याएको बताए ।
गोरखा नगरपालिकालाई खेलकुद हव बनाउनका लागि आफु लागि परेको बताउदै उनले यसै बर्ष गोल्ड कप आयोजनाको तयारीमा कार्यालय रहेको जानकारी दिए ।
