नरेन्द्र ढकाल/गोरखा
चैत्र ८ गते । फागुनको करिब १० गते तिर आरुघाटका बाबुराम बरामलाई घरबाट फोन आयो । काठमाण्डौमा सानो काम गरेर बसेका बाबुराम घरको कुरा सुन्ने बित्तिकै छाँगाबाट खसे जस्तै भए । उनललाई भाउजुले फोन गरेकी थिइन् । ‘भाउजुले फोन गरेर दिदी गर्भवती भएको कुरा सुनाउनुभयो, बिहे नभएको दिदी त्यहीँ माथि अपाङ्गता हुनुहुन्थ्यो कसरी त्यस्तो भयो भनेर हामी सबै छक्क परयौं’ उनले भने । उक्त कुरा थाहा हुने बित्तिकै आरुघाट एक स्वास्थ्य संस्थामा लगेर उनकी दिदीलाई जँचाईयो । स्वास्थ्यकर्मीले उनी गर्भवती भएको र पेटमा ५-६ महिना भन्दा बढिको बच्चा रहेको बताएपछि बराम परिवार उक्त बच्चाको बाबुको खोज्न थाल्यो । ‘भाउजुले सोधीखोजी गर्दा, दिदीले एउटा घर देखाउनु भएछ, अनि हामीले त्यो घरको केटा (आरोपी) को फोटो पठाइदियौं उहाँले हो भनेर इसारा गर्नुभयो’ बाबुरामले भने ।
काठमाण्डौमा खाएको सानो जागिर छोडेर बाबुराम दिदीलाई न्याय दिलाउन घर आए । ११ गते उक्त घटना बारे थाहा पाएका उनले १४ गते आरोपी केटालाई फोन गरे अनि १५ गते घर आए । त्यत्ती बेला वच्चा जन्मिसकेको थियो । ‘जचाउँदा ५÷६ महिनाको बच्चा छ भन्ने कुरा आएको थियो, त्यसको २÷३ मा त बच्चा जन्मिहाल्यो’ बाबुरामले भने । अपाङ्गता भएकी महिलालाई ललाई फकाई वा जबरजस्ती गरेर उक्त घटना भएको हुन सक्ने आशंकामा बराम परिवारले गाउँ भेला बोलायो । उक्त भेलामा आरोपी युवक पनि गाउँ आए ।
वडा अध्यक्ष सहित जनप्रतिनिधि समेत सहभागी भएको भेलामा आरोपी युवकले आफूलाई फसाउँन खोजिएको भन्दै त्यस घटनामा आफ्नो संग्लनता नरहेको जिकिर गरेपछि त्यहाँ निष्र्कष निस्कन सकेन । त्यसपछि पिडित पक्ष इलाका प्रहरी कार्यालय आरुघाटको ढोका ढकढकाउन पुग्यो । ‘गाउँमा भएको भेलामा उहाँहरुले स्वीकार्नु भएन, अनि हामी आरुघाट प्रहरी गयौं त्यहाँ पनि प्रहरीले केही गर्न सकेन’ बाबुराम भने । गाउँमा उक्त समस्याको छिनोफान नभएपछि न्याय खोज्दै अहिले बराम परिवार जिल्ला सदरमुकाम आईपुगेको छ ।
बुधबार जिल्ला प्रहरी कार्यालयमा उक्त घटनाको बारे दुबै पक्ष विच छलफल समेत भयो । ‘हामीले दुबै पक्षलाई झिकाएका थियौ, उहाँहरुलाई राखेर छलफल भयो, तर निष्कर्ष भने निस्किन सकेन, घटना निकास अब अदालती बाटोबाट मात्र निस्केला जस्तो देखिन्छ’ जिल्ला प्रहरी कार्यालयका डिएसपी भेषराज रिजालले भने । उक्त घटनाको टुंगो नाता प्रमाणित गरेर मात्र लाग्ने भएकाले अदालत जानुपर्ने प्रहरीको भनाई छ ।
यता पिडितका आफन्तहरुले भने प्रहरीले घटनालाई हलुका रुपमा लिएको आरोप लगाएका छन् । ‘हामी न्याय पाइन्छकी भनेर जुन उन्मिदका साथ जिल्ला प्रहरी कार्यालयमा आएका थियौं त्यहाँ पनि उक्त वातावरण पाएनौं’ पिडितका भाई बाबुरामले भने । घटना बारे यथेष्ट प्रमाण पेश गरेर प्रहरीलाई किटानी जायरी दिदाँ पनि प्रहरीले आरोपसँग सामान्य सोधपुछ पनि नगरेको गुनासो पिडितको छ । ‘त्यहाँ उहाँलाई सामान्य केरकार समेत गरिएन, हामीले सबै कुरा भन्दा पनि प्रहरी गभ्भीर भए जस्तो लागेन’ उक्त घटनाको बारेमा अध्ययन गर्न काठमाण्डौ बाट आएकी अधिकारकर्मीले भनिन् ।
प्रहरीले पिडितलाई न्याय दिनुका सट्टा, राजनितिक पावरको आडमा पिडकलाई उन्मुक्ति दिन खोजेको उनीहरुको आरोप छ । छलफलले निकास निकाल्न नसकेपछि पिडित पक्ष अदालत जाने तयारीमा रहेको उनीहरुले बताएका छन् ।
