नरेन्द्र ढकाल/गोरखा
फाल्गुण ३० गते । एकपटक मनकामना मन्दिर पुग्ने सबैलाई थाहा छ, व्यापार व्यवसायका लागि त्यहाँ के के हुन्छ भनेर । मनकामनामा खोलिएका अधिकाशं होटलमा ग्राहक तान्ने छुट्टै व्यक्ति राखिएका हुन्छन् । जब केबुलकारको गेटबाट मन्दिर तर्फ प्रवेश गर्ने बित्तिकै केही युवाहरु भक्तजनको हात समात्न आइपुग्छन् । विभिन्न शैलीमा भट्याउदै उनीहरु त्यहाँ पुग्ने जो कसैलाई पनि हैरान पार्न पछि पर्दैनन् । होटलको विज्ञापन देखि फोटो खिचाउने, पुजा सामाग्री बिक्रि गर्ने र उपहारका सामाग्री किन्न भक्तजनलाई बाध्य बनाउनु नै उनीहरुको दिनचर्या हो । ‘लौ आउनुस्, आउनुस्, तपाइँकै घरमै जस्तै, मसिनाको चामल, गुन्दु्रकको अचार, लोकल कुखुराको मासु, त्यसमा घ्यू झ्याइ’ केही दिन अघि हामी मनकामना पुग्दा एक युवा रयाप गितको शैलीमा भट्याउँदै थिए । उक्त समस्याका कारण मनकामना मन्दिर आउने वाक्क भएपछि गाउँपालिकाले नियन्त्रणको प्रयास थालेको छ ।
मनकामना बजारलाई सिसिटिभी क्यामेराबाट निग्रानी गर्ने तयारी गरिएको छ । नेपालकै ऐतिहासिक मनकामना मन्दिर घुम्न आएका भक्तजनहरुलाई स्थानीय व्यापारी÷व्यवसायीले व्यापारका नाममा अनावश्यक दुःख दिएको भन्दै उक्त क्यामेरा राख्न लागिएको हो । ‘मनकामना बजारलाई व्यवस्थीत बनाउन हामीले सिसिटिभी बाट निग्रानी गर्न लागेका छौं, केही दिनमा उक्त कार्यले पुर्णता पाउँछ’ शहिद लखन गाउँपालिकाका अध्यक्ष रमेश थापा मगरले भने ।
मनमनामाईको दर्शनका लागि आएका भक्तजनहरुलाई आफ्नो होटल, रेष्टुरेन्टमा खाना खुवाउन, फोटो खिचाउन र अन्य उपहारका सामान किन्नका लागि बाटो छेक्ने, अनावश्यक प्रलोभन देखाएर जर्बजस्ती गर्ने जस्ता क्रियाकलाप बढेको गुनासो आएपछि गाउँपालिका उक्त निर्णयमा पुगेको हो । ‘व्यापारका नाममा अलि बढि नै त्यस्ता गतिविधि भएको छ भन्ने गुनासो आयो, हामीले अध्ययन गर्दा पनि व्यथिति नै पाइयो, त्यसैले नियन्त्रणको प्रयास गरेका हौ’ थापा मगरले भने ।
केबुलकारको गेट देखि मन्दिर हुँदै प्रहरी चौकी सम्म विभिन्न ठाउँमा सिसिटिभी क्यामेरा जडान गरिने त्यसको नियन्त्रण भने इलाका प्रहरी कार्यालय मनकामनाले गर्ने तयारी गरिएको छ । कहाँ कसले के गरेको छ प्रहरीले कार्यालयमा बसेर हेर्न र गलत गर्नेलाई कारवाही गर्ने बताइएको छ । ‘प्रहरी कार्यालयमा त्यसको कन्ट्रोल हुन्छ, प्रहरीले नै निग्रानी गर्छ, जसले बाटोमा आएर भक्तजनलाई त्यस्तो व्यवहार गर्छ उसलाइ तुरुन्तै पक्राउ गरिन्छ’ थापाले भने ।
सिसिटिभी राख्नका लागि ८ लाखको बजेट समेत निर्माण गरिएको छ । गाउँपालिकाको २ लाख अनुदान, वडा कार्यालयको ५ लाख र स्थानीय उद्योगवाणिज्य सघंको पहलमा जुटाइएको १ लाख ५ हजार गरी ८ लाख ५ हजारमा सिसिटिभि क्यामेरा राख्न लागिएको वडा अध्यक्ष अचल थापाले जानकारी दिए । ‘हामीले तयारी गरिसकेका छौ, यो काम उद्योग वाणिज्य संघको नेतृत्वमा हुन्छ, उहाँहरुले आवश्यक तयारी गर्दै हुनुहुन्छ’ उनले भने ।
उद्योग वाणिज्य सघं मनकामना बजार इकाईका अध्यक्ष रामकुमार श्रेष्ठ सवारी दुरघटनामा परी दुखद निधन भएकाले उक्त काम केही ढिलो भएको वडा अध्यक्ष थापाले बताए । ‘उद्योग वाणिज्य संघसँग छलफल भइरहेको छ, केही दिनमै जडान कार्य गर्ने उहाँहरुले बताउनुभएको छ’ थापाले भने । नेपालकै ऐतिहासिक मनकामना मन्दिरमा दिनहुँ हजारौं भक्तजनहरु पुजाका लागि आइपुग्छन् । मनकामना मन्दिरमा नेपाल मै पहिलो केबुलकार समेत सञ्चालन गरिएकाले त्यसले पनि आकर्षण बढाएको छ ।
