गोरखा समाचारदाता
लाप्राकको गुप्सीपाखामा जग्गा रेखाङ्कन गरिएको छ । गैरआवासिय नेपाली संघ एनआरएनएले लाप्राकको गुप्सीपाखामा निर्माण गरिहेको एकिकृत बस्तीको जग्गा पिडित लागि विभाजन गरिएको हो । ‘हामीले जग्गाको रेखाङ्कन गरायौं, अब कसको जग्गा कुन पर्छ भन्ने एकिन भएको छ’ धार्चे गाउँपालिकाका अध्यक्ष सन्त बहादुर गुरुङले भने । एनआरएनएका अध्यक्ष भवन भट्ट, प्रमुख कार्यकारी अधिकृत डाक्टर हेमन्त दुवाडी, इन्जिनियर सुवास अधिकारी लगायतको एनआरएनएका उच्च पदस्थ अधिकारीहरुको उपस्थितीमा स्थानीयलाई गोला थुताइएको हो ।
‘५७३ घरधुरीलाई १६ वटा ब्लकमा विभाजन गराएर रेखाङ्कन गरी आ–आफ्नो घडेरी छुट्याइयो हो’ अध्यक्ष गुरुङले भने । घडेरीको रेखाङ्कन भएपछि स्थानीय समेत खुसि भएका छन् । उनीहरुले यस अघि घर बनाउने क्रममा आफ्नो घर कुन पर्छ भन्ने एकिन नभएको भन्दै निर्माण कार्यका लागि आवश्यक सहयोग समेत गरेका थिएनन् । त्यस पछि एनआरएनएका तत्कालिन अध्यक्ष शेष घले चिठ्ठा थुताउने निर्णय गरेका थिए ।‘आफू बस्ने घर कुन पर्छ थाहा थिएन, भएको काठ, ढुङ्गा दिन पनि सबैले इन्कार गर्दै आएका थिए’ वडा अध्यक्ष राज गुरुङले भने ।
सोही कार्यक्रममा उपस्थित भएका एनआरएनएका अध्यक्ष भवन भट्टले घरको भौतिक संरचना र छाना छाउने जस्ता पनि परिर्वतन गरिदिने उद्घोष गरेका छन् । ‘यहाँहरुको चाहना अनुसार नै घरको संरचना परिर्वतन गर्ने हामीले निधो गरेका छौ, छानामा अब प्लास्टिकको जस्ता प्रयोग गर्ने निर्णय भएको छ’ अध्यक्ष भट्टलाई उदृत गर्दै गाउँपालिका अध्यक्ष गुरुङले भने । पहिले निलो रङको जस्ताले छाउने स्टेटमेन्ट भएपनि अब फाइबरको जस्ताले छाउने तयारी गरिएको छ ।
गुप्सीपाखा निकै चिसो ठाउँमा रहेकाले हिउँ पर्ने र सधै शित परिरहने हुँदा जस्ताको छानामा समस्या हुने स्थानीयको गुनासोका आधारमा अहिले फाइबरको जस्ताले छाउने निष्र्कष निकालिएको हो । ‘तला छाप्ने ठाउँमा पनि माटो सट्टा काठ प्रयोग कुरामा भएको छ, त्यस बारेमा पनि उहाँले जानकारी गराउनु भएको छ’ गुरुङले भने । त्यसको लागि स्थानीयले पनि सहयोग गर्नुपर्ने प्रस्ताव राखिएको छ । उनीहरुले स्थानीय सामुदायिक वन मार्फत पुर्जी काठ काट्ने त्यसको ढुवानी देखि चिर्ने काम समेत एनआरएनएले गर्ने सहमती भएको छ ।
‘हाम्रो त्यहाँको काठ तला छाप्नको लागि त काम लाग्दै तर उहाँहरुले अरु काममा प्रयोग गर्नुहुन्छ तल्ला छाप्न आवश्यक काठ भने उहाँहरुले नै उपलब्ध गराउने बताउनुभएको छ’ अध्यक्ष गुरुङले भने । तला माथि बाँसले बारिएको ठाउँमा पनि ब्लक लगाउने बताइएको छ । फाइबरको जस्ता ल्याउने भएपछि पहिले ल्याएको मेटलको जस्ता बिक्रि गर्ने भट्टले बताएका छन् । भुकम्पको केन्द्रबिन्दु बारपाक नजिकै रहेको उक्त गाउँ भुकम्प पहिले देखि पहिरोको कारण जोखिम थियो ।
पुरानो लाप्राक गाउँ भन्दा माथि पुप्सीपाखा भन्ने ठाउँमा एकिकृत बस्तीको रुपमा नयाँ बस्ती बसाउन लागिएको हो । विभिन्न कारण देखाएर भाखा राख्दै आएको एनआरएनएले आगामी असार मसान्त सम्म निर्माण काय सम्पन्न गरी घर हस्तान्तरण गर्ने बताउँदै आएको छ ।
