गोरखा समाचारदाता
फाल्गुण १८ गते । लामो समय चितवनमा थन्किएको काठको ढुवानी सुरु भएको छ । भुकम्प पिडितलाई वितरण गरिने अनुदानको काठको जिल्ला भित्रने क्रम सुरु भएको हो । ‘काठ ढुवानी सुरु भएको छ, ढिलै भएपनि जिल्लामा काठ आउन थालेको छ’ जिल्ला वन कार्यालयका सहायक वन अधिकृत कृष्ण प्रसाद भट्टले भने । अघिल्लो आर्थिक वर्षमा ठेक्का लिएको मनकामना सप्लार्यस हरमटारीले काठ ढुवानी नगरी समय गुजारेपछि ठेक्का रद्ध गरिएको थियो । केही समय अघि नयाँ प्रक्रियाबाट घिमिरे फर्निचर उद्योगले काठ ढुवानीको इजाजत पाएमा उसले ढुवानी थालेको हो ।
अहिले सम्म झण्डै १५ सय क्युफिट काठ जिल्ला आइसेकेको जिल्ला वन पैदावार समितिका सदस्य सचिव समेत रहेका सहायक वन अधिकृत भट्टले बताए ‘ सुरुको दिन २७३, त्यसपछि ५००, अर्को दिन ८०० क्युफिट र आज पनि सोही परिमाणमा काठ आएको हामीले जानकारी पाएका छौ ।’ १५ सय क्युफिट काठ उपलब्ध भएपछि पहिलो चरणमा वितरण गर्ने वन कार्यालयको योजना छ ।
गत वर्ष नै दोश्रो किस्ताको लागि सिफारिस भएका लाभग्राहीले घर निर्माणका आवश्यक काठ उपलब्ध गराइदिन माग गर्दै वन कार्यालयमा निवेदन दिएका थिए । ‘गएको जेठ अघि नै दोश्रो किस्तामा सिफारिस भएका, अन्य सामुदायिक वनबाट काठ नपाएकाहरुको निवदेन दिनुभएको छ उहाँले नै काठ पाउनु हुन्छ’ सहायक वन अधिकृत भट्टले भने । त्यतिबेला सहुलियतको काठ माग गर्दै ४५० भन्दा बढि लाभग्राहीले जिल्ला वन कार्यालयमा निवदेन दिएका थिए । जिल्ला वन पैदावार समितिले गत जेठ २५ गते गरेको निर्णय अनुसार ३१६ लाभग्राही काठ वितरण गरिने वन कार्यालयको भनाई छ ।
यस अघि जिल्लाका भुकम्प पिडितहरुलाई ९० प्रतिसत छुटमा चितवनबाट ल्याउने भनिएको १० हजार क्यु फिट काठ कुहिएर खेर जान भन्दै चर्चा हुने गरेका थियो । ‘हामीले सार्वजानिक खरिद ऐन मिचेर काम गर्न मिल्दैन थियो, सबै कुरा प्रक्रियामा हुँदा केही ढिलाई हुन गएको हो अब काठ आउन थालेको छ’ जिल्ला वन अधिकृत जिवनाथ पौडेलले भने ।
अहिले जिल्लामा पुनर्निर्माणको कामले तिब्रता लिइरहेका बेला भुकम्प पिडितले सहुलियतको काठ प्रयोग गर्न नपाए पनि जिल्ला वन कार्यालयको पहलमा निजि, कबुलियती, र सामुदायिक वन कटानी गर्न मिल्ने गरी मागको आधारमा स्वीकृती दिएको उनले बताए । उक्त काठ ल्याएपछि संकलन पिडितले बुझाएको १० प्रतिशत रकम जम्मा गरेर अरु काठ पनि ल्याउने योजना वन कार्यालयको छ ।
