नरेन्द्र ढकाल/गोरखा
फाल्गुण १० गते । उत्तरी गोरखाको धार्चे गाउँपालिकामा प्याराग्लाइडिङ सुरु हुने भएको छ । सोको लागि आवश्यक अध्ययन समेत भइसकेको छ । धार्चे ५ सिङ्लाका स्थानीय मान बहादुर गुरुङले प्याराग्लाइडिङ उडानको तालिम लिएर पेसा सुरु गर्ने तयारी गरेका छन् । ‘एकदम सम्भावना छ, प्याराग्लाइडिङ गर्न आवश्यक हाइट पनि छ, ठाउँ पनि सुन्दर छ, अब म सुरु गर्छु’ गोरखा समाचारसँग कुराकानी गर्दै गुरुङले भने । जिल्लामा पोखराको सराङकोट भन्दा अग्ला चचुराहरु रहेपनि प्रवद्र्धनको अभावमा प्याराग्लाइडिङ ओझेलमा परेको भन्दै उनले गाउँपालिकाको समन्वयमा कम्पनी नै दर्ता गरी काम सुरु गर्ने बताएका छन् ।
स्याङ्जाको बाबु एडभेन्चर प्रालि मार्फत प्याराग्लाडिङको कोर्ष गरेका गुरुङले धार्चे गाउँपालिकाको सम्भावित स्थानहरुबाट परिक्षण उडान समेत गरिसकेका छन् । ‘कम्पनी नै दर्ता गरेर काम गर्ने मेरा योजना छ, मैले त्यसको परिक्षण समेत गरिसकेको सकेको छु ’ गुरुङले भने । उनले धार्चेका ६ वटा डाँडाबाट उडान गरिसकेका छन् । बारपाक र लाप्राकको सिमानामा रहेका पुस्काङ डाँडा, लाप्राकको रिञ्जुलुङ र रुकाङ डाँडा लगायत ठाउँबाट परिक्षण उडान समेत भइसकेको छ । ‘रुकाङ डाँडाबाट हामीले गोरखाको छेवेटार, अजिरकोटको बालुवा बजार र आरुघाटमा समेत ल्याण्ड गर्न सकिन्छ, मैले परिक्षण गरिसकेको छु’ उनले भने ।
मनास्लु पदमार्ग आउने पर्यटकहरुलाई प्याराग्लाडिङ मार्फत केही समय भुलाउन सकिने भन्दै उनले व्यवसायी रुपमा काम गर्ने योजना बनाएका हुन् । पछिल्लो समय गाउँ÷गाउँमा सडक पुग्ने क्रम बढेसँगै पदमार्गहरु छोटिएको भन्दै उनले पर्यटकलाई भुलाउने उचित माध्यम प्याराग्लाडिङ हुने तर्क अगाडी सारेका छन् । ‘पहिले लार्केपास गर्न १७/१८ दिन लाग्थ्यो, अहिले त माछा खोला सम्म गाडी नै जान्छ अनि ५/७ दिनमै लार्के पास गर्न सकिन्छ, यदि विचमा प्याराग्लाइडिङ पनि गराउन सकियो भने उनीहरु केही दिन भुुलाउन सकिन्छ’ उनले भने ।
प्रचुरमात्रामा शाहसिक पर्यटनको सम्भावना रहेपनि सरकारी क्षेत्रबाट अहिले सम्म त्यसको प्रर्वद्धनका लागि काम नभएको भन्दै गुरुङले सरकारले उचित वातावरण निर्माण गरिदिए निजि क्षेत्रको आकर्षण बढ्ने बताए । ‘हामीले मात्र चाहेर हुँदैन, अहिले त स्थानीय सरकार समेत बनेको छ, सबै मिलेर काम गर्न सकियो भने धार्चेमा धेरै पर्यटक तान्न सकिन्छ ।’ पोखरामा जस्तो ताल नभएपनि सुन्दर हिमश्रृखला, हरियाली पाखापखेरा र गाउँबस्तीको दृष्य हेर्न पर्यटकहरु लालायित हुने भन्दै उनले प्याराग्लाइडिङले पर्यटनमा ठुलो टेवा पुरयाउने बताए । धार्चेको अलवा अहिले उनी गोरखा विभिन्न ठाउँहरुमा पनि प्याराग्लाडिङको सम्भाव्यता अध्ययनमा व्यस्त छन् । प्याराग्लाडिङ सुरु गर्नका लागि ९ लाख भन्दा बढि लागत आवश्यक पर्ने उनको भनाई छ । स्थानीय तहले उडाउने र अवतरण गर्नेको स्थानको व्यवस्था गरी आवश्यक पुर्वाधार निर्माण गरिदिने हो भने आफूले पर्यटकहरु ल्याएर भएपनि प्याराग्लाडिङ गराउन सक्ने बताए । अहिले जिल्ला सदरमुकाम गोरखामा रहेका गुरुङले गोरखाको उपल्लोकोट बाट परिक्षण उडानको अध्ययन गरिरहेका छन् ।
उता धार्चे गाउँपालिका अध्यक्ष सन्त बहादुर गुरुङले पनि प्याराग्लाडिङ लागि गाउँपालिका आवश्यक समन्वय गर्ने तयारी गरेको बताए । ‘हामी एक्लैले धार्चेमा केही गर्न सक्दैनौं, यसरी काम गर्छु भनेर आउनेहरुलाइ के सहयोग गर्नु पर्छ, गाउँपालिका सहयोग गर्न तयार छ’ अध्यक्ष गुरुङले भने । गाउँपालिकाले पनि पर्यटनलाई मुख्य प्राथमिकतामा राखेको छ ।