जेष्ठ ७, २०७३- बेलायत सरकारले नेपाल भ्रमणमा रहेका आफ्ना नागरिकलाई राजनीतिक गतिविधिमा संलग्न नहुन सुझाएको छ । शुक्रबार ट्राभल एडभाइजरी जारी गर्दै उसले ‘नेपालमा हुने कुनै राजनीतिक गतिविधिमा संलग्न भए जरिबाना वा देश निकाला हुनसक्ने’ भन्दै यस्ता गतिविधिबाट टाढै बस्न सुझाव दिएको हो ।
नेपालको आन्तरिक राजनीतिमा विदेशी नागरिकको संलग्नता बढेपछि अध्यागमन विभागले यस्ता गतिविधिमा संलग्नलाई तत्काल देश निकाला गर्ने निर्णय गरेको थियो । उसले यस्ता गतिविधिमा संलग्न क्यानेडिन नागरिक रोबर्ट पेनरलाई देश निकाला गर्दै बेलायती नागरिक मार्टिन पेवरलाई सचेत गराउँदै दुतावासका अधिकारीलाई बुझाएको थियो ।
नयाँ संविधान जारी भएपछि त्यसको विरोधमा भइरहेका प्रर्दशन र र्याली आकस्मिक रुपमा आयोजना हुनसक्ने र ती हिंस्रक हुनसक्ने भन्दै उसले आफ्ना नागरिकलाई यस्ता गतिविधिबाट टाढै बस्न सचेत गराएको हो ।