गौशाला, जेठ ४ गते । महोत्तरी जिल्लाबाट एनेकपा (माओवादी)का पूर्व सभासद् रहनुभएकी बुधनीदेवी महतोलाई गएराति अज्ञात समूहले मरणाशन्न हुनेगरी कुटपिट गरेको छ ।
जिल्लाको लक्ष्मिनियाँ गााविस–८ घर भएकी पूर्व सभासद् महतो गएराति आफ्नै घरमा बसिरहेको बेला ८÷१० जनाको समूहमा आएको अज्ञात व्यक्तिले उहाँलाई मरणाशन्न हुनेगरी कुटेको माओवादी नेता महादेव यादवले बताउनुभयो ।
घरेलु हातहतियार र लठ्ठी भाटा लिएर आएका अज्ञात व्यक्तिको कुटाइबाट सभासद् महतो गम्भीर घाइते हुनुभएको छ भने उहाँको अवस्था चिन्ताजनक रहेको छ ।
गएराति करिब १० बजेको समयमा अज्ञात व्यक्तिहरुले आफ्नै सुत्ने कोठामा बसिरहेकी उहाँलाई शरीरभरि अन्धाधुन्द लठ्ठी र भाटा प्रहार गरी घाइते बनाएको थिए भने अहिले उहाँको उपचार जनकपुर अञ्चल अस्पतालमा भइरहेको माओवादी नेता पिकरु पासवानले बताउनुभयो ।
उहाँ हिँडडुल गर्न र बोल्न नसक्ने अवस्थामा पुग्नुभएको छ भने उहाँको उपचारमा संलग्न चिकित्सकले उहाँको अवस्था चिन्ताजनक रहेको नेता पासवानले बताउनुभएको छ ।
सभासद् महतोलाई कसले के कारण कुटपिट गरेको भन्नेबारे केही खुलेको छैन भने जिल्ला प्रहरी कार्यालय महोत्तरीलाई यस घटनाबारे केही जानकारी नभएको जनाइएको छ ।
रासस