गोपीकृष्ण ढुंगाना
फोटो :फाइल फोटोकाठमाडौं: पशुपति क्षेत्र विकास कोषले पशुपतिनाथ मन्दिरमा विगत चार वर्षयता चढाइएका सामग्री बिक्रीमा राख्ने भएको छ । २०६८ सालदेखि भण्डारमा थन्क्याइएका विभिन्न कपडा र शृंगार सामग्री सोभेनियर पसल खोलेर बिक्री गर्न लागिएको हो । यसका लागि कोषले शनिबारदेखि सामग्री सूचीकृत गर्ने भएको छ ।
कोषले २०६८ चैतमा मन्दिर तथा पूजा व्यवस्था नियमावली बनाएर लागू गरेपछि मन्दिरमा चढाइने जिन्सी सामग्रीलाई मुचुल्का उठाएर मन्दिर परिसरकै भण्डारमा राख्दै आएको थियो । पशुपतिनाथ मन्दिर तथा गुठी व्यवस्थापन महाशाखाका प्रमुख भोलाप्रसाद सिटौलाले चढाइएका जिन्सी सामग्री मन्दिरको पश्चिम द्वारछेउमा सोभेनियर पसल सञ्चालन गरी बिक्री गर्न लागिएको बताए ।
उनले शुक्रबार अन्नपूर्णसँग भने, ‘मन्दिरमा शिवनामी सल, रामनामी सल, सारी, ब्लाउज, धोती, पेन्टी, ब्रा, सेन्डो, रुमाल, गम्चा, कुर्तासुरुवालजस्ता सामग्री चढाइएका छन् । यसबाहेक धेरै चढाइनेमा सौभाग्यका सामग्री पनि छन् ।’
२०६८ चैतसम्म भक्तजनले चढाएका यस्ता सामग्री भट्ट र भण्डारीले नै प्रयोग गर्दै आएका थिए । सिटौलाले भने, ‘खासगरी मारबाडी समुदायमा आफूले गर्ने व्यवसाय वा फ्याक्ट्रीको पहिलो उत्पादन भगवान्लाई चढाउने प्रचलन छ । त्यसैले सारी, सेन्डो, पेन्टी, ब्राजस्ता सामग्री पनि चढाइएको हुनसक्छ । कतिपयले विवाहअघि यस्ता सामग्री चढाएका हुनसक्छन् ।’
भारतका शिरडी माई, तिरुपति बालाजीलगायत मन्दिरमा पनि भक्तजनले चढाएका यस्ता सामग्री अन्य भक्तजनले न्यूनतम मूल्यमा खरिद गर्न पाउने व्यवस्था छ ।
मन्दिरमा चढाइएका सुनचाँदी र अन्य धातु भने यथावत् राखिने कोषले जनाएको छ । कोषले भण्डारमा रहेका सामग्रीको न्यूनतम मूल्य तोक्न कोष सञ्चालक परिषद्का सदस्य रमेशराज शिवाकोटीको संयोजकत्वमा मूल्यांकन समिति बनाएको छ । सुरुमा माघ महिनामा चढाइएका समग्रीका पोका खोलिने भएको छ ।
कोषका कार्यकारीनिर्देशक रमेश उप्रेतीका अनुसार क्रमशः सबै पोका खोली मूल्य स्टिकर राखिनेछ । मन्दिरमा प्रत्येक दिन चढाइने सामग्रीको एउटा पोको पारी मुचुल्का बनाइन्छ ।
उप्रेतीले भने, ‘पशुपतिनाथमा चढाइएका जे वस्तु वा सामग्री भए पनि कोषले स्वीकार्नुपर्ने भएकाले सबै खालका सामग्री प्राप्त भएका हुन् । यसको बिक्रीबाट उठेको रकम मन्दिरको खातामा जम्मा हुनेछ । उक्त रकमबाट भक्तजनको मागअनुसारका सामग्री खरिद गरी बिक्री गरिने उनले बताए ।
कोषका सदस्यसचिव गोविन्द टन्डनले मन्दिरमा चढाइएका जिन्सी सामग्री अन्य भक्तजनलाई महत्त्वपूर्ण हुनसक्ने भएकाले बिक्री गर्न लागिएको बताए । उनले भने, ‘पशुपतिनाथ मन्दिर अंकित सुन र चाँदीका सिक्का बनाएर बिक्री गर्ने कोषको योजना छ ।’
महाशिवरात्रीका अवसरमा कोषले विशेष पूजाको कारोबार पनि मन्दिर प्रांगणमा रहेको एसबीआई बैंकबाट भौचरमार्फत गर्ने भएको छ । यो काम सफल भए बिक्री गर्ने जिन्सी सामग्रीको पनि बैंकबाटै कारोबार गर्ने योजना छ ।
annapurnapost