मनिका झा
जनकपुरधाम: मधेसी मोर्चाको ६ महिना लामो बन्द हड्तालका कारण नेपालको एकमात्र रेल्वे ब्रोडगेजको निर्माण कार्य प्रभावित भएको छ ।
महोत्तरी जिल्लाको बर्दिबासदेखि धनुषाको जनकपुरबाट भारतको जयनगर सम्म ब्रोडगेज निर्माण कार्य दुई वर्षमा सम्पन्न गर्ने लक्ष्य राखिएपनि बन्द हड्तालको कारण प्रभावित भएको हो ।
बन्द हड्तालले काम अवरुद्ध भएपछि एक वर्ष ढिलाई हुन सक्ने निर्माण कम्पनी कालिका रमण कन्सट्रक्सनले जनाएको छ । तराई आन्दोलनले ६ महिनासम्म काम ठप्प भएको र अब ९ महिना मात्र थप समय रहेकोले यति छिटो काम पुरा गर्न नसकिने कन्सट्रक्सनका बलराम महतोले बताए ।
भारत सरकारको आर्थिक सहयोगमा करिब ९ अर्बको लागतमा तीन चरणमा ६९ किलोमिटर लामो ब्रोडगेज रेललाइन निर्माण कार्य अन्र्तगत पहिलो चरणमा पुल, कलभर्ट, माटो पुर्ने लगायतका कामहरु भएका छन् ।
दोस्रो चरणको काम सुरु गर्न थालिएको कालिका कन्सट्रक्सनले जनाएको छ । भारतबाट विग्घी, जलाध सहितका केही ठूला पुलका नक्सा र डिजाइनहरु नपठाईएका कारण पनि निर्माण कार्यमा ढिलाई भएको महतोले बताए ।
भारतको इरिकन इन्टरनेशनल कम्पनीको निगरानीमा धनुषा र महोत्तरी जिल्लामा छुट्टाछुट्टै निर्माण कम्पनीले ठेक्का मार्फत काम गरिरहेका छन् ।
जनकपुरबाट पूर्वको गाउँ कपिलेश्वरदेखि पूर्व इनर्वासम्म नायक इन्फ्रा कन्सट्रक्सन कम्पनीले काम अगाडी बढाएको र त्यस क्षेत्रमा माटो पुर्ने, कलभर्ट तथा पुल निर्माण कार्य भइरहेको जनाईएको छ । त्यसैगरी बिजलपुरादेखि महुवा कपिलेश्वर सम्म कालिका रमण कन्सट्रक्सनले निर्माण कार्यको ठेक्का पाएको हो ।
‘पूर्ब तर्फको काम धेरै अगाडी बढिसकेको र पश्चिम तर्फको कामपनि तिव्रगतिमा भइरहेको रेल्वे विभागका साइट इञ्जिनियर बिनोदकुमार ओझाले बताए ।
बिक्रम संबत १९९४ मा दाउरा इञ्जनबाट नेपालमा रेल सुरु भएको थियो । नेपालको जंगलबाट काठ ढुवानीका लागि भारतमा रहेको तत्कालिन अंग्रेज शासकले सुरु गरेको दाउराबाट चल्ने रेललाई पछि भारत सरकारको सहयोगमा कोइला इन्धननबाट लामो समय सञ्चालन भएको थियो ।
अहिले तीन वर्षदेखि रेल पूर्ण रुपमा बन्द रहेको छ । रेल्वे विस्तार भएपछि भारततर्पm जयनगर र नेपालमा महोत्तरीको बर्दिबास बजार हुने हुने जनाईएको छ ।
annapurnapost
