गोरखा । गोरखा नगरपालिका वडा नम्बर २ का स्थानियहरु मिलेर उठाएको करिव ५ लाख रुपैयाँ प्रधानमन्त्री दैवि प्रकोप उद्वार कोषमा जम्मा गरिएको छ ।
वडास्तरीय विपद ब्यवस्थापन समितिकाे सक्रियतामा उठाएको रकम गोरखा बजारमा रहेको राष्ट्रिय बाणिज्य बैंकको शाखा मार्फत कोषमा जम्मा गरिएको वडाध्यक्ष रहम तुल्ला मियाँले बताए ।
उनका अनुसार वडाबासीले आफुखुशी दिएको कुल ४ लाख ५४ हजार ६५१ रुपैयाँ ४० पैसा बैंक मार्फत जम्मा गरेर भौचर प्रमुख जिल्ला अधिकारीलाई बुझाएको हो ।
‘हामी हाम्रो वडामा भएको सबै टोलमा पुगेर सहयोग माग्यौ’ उनले भने, ‘टोलबासीले खुशी साथ नगद र क्यूआर मार्फत दिएको रकमको भौचर समेत बुझायौ प्रजिअलाई ।’
१२ वटा टोल रहेको वडामा ९ जनाले क्यूआर मार्फत २४ हजार ७७५ रुपैयाँ ४० पैसा र नगद ४ लाख २९ हजार ८७९ रुपैयाँ संकलन भएको थियो ।
नगद रकमको बैंक भौचर र क्यूआरको स्क्रिन सट राखेर गोरखा नगरपालिकाका प्रमुख कृण्ण राना मगर तथा सर्व साधारणको उपस्थितीमा जिल्ला प्रशासनका प्रमुख जिल्ला अधिकारी तुलसी बहादुर श्रेष्ठलाई बुझाएको पनि वडाध्यक्ष मियाँले जानकारी दिए ।
वडाले सहयोग उपलब्ध गराउने सबैको नाम सामाजिक सञ्जाल र वडा कार्यालयको सूचना पार्टीमा सार्वजनिक गरेको छ ।
उक्त कार्यमा कुल ४४५ जनाले रकम उपलब्ध गराएको पनि वडाध्यक्ष मियाँले बताए ।