गोरखा । गोरखा सदरमुकाममा रहेको २ निजी बिद्यालयले करिब ३ लाख रुपैयाँ प्रधानमन्त्री दैवि प्रकोप उद्वार कोषमा पठाएको छ ।
सदरमुकामको मोर्डन सेकेन्डरी ईग्लिस बोर्डिङ स्कुल र गोरखा इग्लिस बोर्डिङ स्कुलले कोषमा जम्मा हुने गरी २ लाख ७५ हजार ८१५ रुपैयाँ मोर्डन सेकेन्डरी ईग्लिस बोर्डिङ स्कुलका प्रिन्सिपल सिताराम तिवारीले बताए ।
उनका अनुसार उक्त रकम स्कुलमा पढने बिधार्थी, तिनका अभिभावक, स्कुलमा कार्यरत शिक्षक र बिधालयको तर्फबाट संकलन गरेर पठाइएको हो ।
ऐच्छिक रुपमा जम्मा भएको उक्त रकम भदौ १८ गते बिहीबार नै प्याब्सन रिलिफ फण्डमा पठाएर नेपाल सरकार प्रधानमन्त्री दैवि प्रकोप उद्वार कोषमा जम्मा गोरखा इग्लिस बोर्डिङ स्कुलका प्रिन्सिपल बावुराम तिवारीले जानकारी दिए ।
उनीहरुका अनुसार दुवै स्कुलका बिधार्थी तथा तिनका अभिभावकहरुबाट १ लाख ४१ हजार ८०० रुपैयाँ संकलन भएको थियो । त्यस्तैगरी, दुवै स्कुलका कर्मचारीहरुबाट ७४ हजार १५ रुपैयाँ र स्कुलको तर्फबाट ६० हजार रुपैयाँ राखेर कोषमा पठाइएको हो ।
बिधालयले भदौ १० गते बुधबारको बिनाशकारी भोटेकोशी बाढी पहिरोको घटनामा परी ज्यान गुमाएका सम्पूर्ण प्रियजनप्रति हार्दिक श्रद्वाञ्जली अर्पण गर्दै शोक सन्तप्त परिवार प्रति हार्दिक समवेदना समेत प्रकट गरेको छ । साथै प्रभावित सम्पूर्ण आमावुवा, दिदीबहिनी, दाजुभाई र बालबालिका प्रति बिधालय परिवार गहिरो सहानुभूति एवं एैक्यवद्वता जनाएको छ ।
साथै बिधालयले गरेको सहयोगबाट विपत्तिमा परेका परिवारहरुलाई केही राहत पुग्ने विश्वास लिएको बिधालय प्रशासनले जनाएको छ ।