गोरखा । भर्दौ १० गते बुधबार भोटेकोशी नदीमा आएको बाढीले बगाएर ल्याएको ६९ शव गोरखामा फेला परेको छ ।
हिजो बुधबारसम्म जिल्लाको विभिन्न स्थानमा गरी कुल ६९ शव फेला परेको जिल्ला प्रहरी कार्यालय गोरखाका प्रहरी नायब उपरिक्षक एवं सूचना अधिकारी राज कुमार श्रेष्ठले बताए ।
उनका अनुसार हिजोसम्म फेला परेको शवमध्य ५९ शवलाई सुरक्षित ब्यवस्थापन गरिएको छ । ६ शव आफन्तले पहिचान गरेर लगेको र अब जिल्लामा ४ शव बाँकी रहेको सूचना अधिकारी श्रेष्ठले जानकारी दिए ।
उनका अनुसार पहिचान भएका शवमा गोरखाबाट पोखराको पश्चिमाञ्चल क्षेत्रिय अस्पतालमा पठाएको ११ शव मध्य ४ र गोरखामा नै पहिचान भएका २ शव गरी कुल ६ शव कानूनी प्रकृया पुरा गरी आफन्तलाई बुझाइएको छ ।
५९ शव सुरक्षित ब्यवस्थापन
जिल्लाको शहिद लखन र गण्डकी गाउँपालिकाको त्रिशुली नदी तटीय क्षेत्रमा फेला परेका मध्य ५९ शव सुरक्षित ब्यवस्थापन गरिएको हो ।
गोरखामा ३ पटक गरी २ स्थानमा ५२ शवहरु र पोखरा लगिएका ७ गरी कुल ५९ शव सुरक्षित ब्यवस्थापन गरिएको सूचना अधिकारी श्रेष्ठले बताए ।
फेला परेका शवमध्य २९ शव शहिदलखन गाउँपालिका–९ को बुंकोट घाटमा र २३ वटा शव गोरखा नगरपालिका–१२ को अवुवामा रहेको लुदी खोला दोभानमा ब्यवस्थापन गरिएको छ ।
सोही क्षेत्रमा यस अघि ७ वटा र हिजो १६ वटा गरी २३ शव सुरक्षित रुपमा ब्यवस्थापन गरिएको हो ।
यस अघि पहिचान हुन नसकेको ११ शव पोखरा पठाईएकोमा ७ शव पोखरामा नै सुरक्षित ब्यवस्थापन गरिएको थियो ।
४ शव २ अस्पतालमा
बाढी बगाएर ल्याएका मध्य अब जिल्लामा ४ शव बाँकी रहेको छ । ति मध्य १ शव गोरखा एनपिआई र ३ शव प्रदेश अस्पताल गोरखामा राखिएको छ ।
ति शवहरु पनि पहिचान हुन ढिला भएको खण्डमा सुरक्षित ब्यवस्थान गरिने सूचना अधिकारी श्रेष्ठले जानकारी दिए ।
बुधबार ३ शव फेला
बाढी बगाएर ल्याएका शवहरु साता दिन पछीसम्म पनि फेला पर्ने क्रम जारी रहेको छ । खोज तलासका क्रममा जिल्लाको त्रिशुली नदी किनारको विभिन्न स्थानमा गरी बुधबार मात्रै ३ वटा शव फेला परेको प्रनाउ तथा सूचना अधिकारी श्रेष्ठले जानकारी दिए ।