एजेन्सी । भारतकाे ६ राज्यमा स्वाइन फ्लु अर्थात् H1N1 भाइरसको सङ्क्रमण बढेपछि स्वास्थ्य निकायहरूले सतर्कता अपनाएका छन् ।
सङ्क्रमण बढ्दै गएपछि उत्तराखण्ड, हिमाचल प्रदेश, हरियाणा र पञ्जाबसहित दिल्लीका राज्यले स्वास्थ्यसम्बन्धी परामर्श जारी गर्दै अस्पतालहरूलाई तयारी अवस्थामा रहन निर्देशन दिएका छन् ।
दिल्लीमा यस वर्ष हालसम्म इन्फ्लुएन्जा–ए का २ हजार ३९२ सङ्क्रमित भेटिएका छन् । तीमध्ये १ हजार ७७७ जनामा H1N1 अर्थात् स्वाइन फ्लु पुष्टि भएको छ । गत वर्ष यही अवधिमा H1N1 का २२९ सङ्क्रमित मात्रै भेटिएका थिए । यस आधारमा दिल्लीमा स्वाइन फ्लुका बिरामीको सङ्ख्या करिब ८ गुणाले बढेको देखिएको छ ।
अगस्ट २० मा मात्रै दिल्लीमा ११४ नयाँ H1N1 सङ्क्रमित भेटिएका थिए । यसबाहेक H3 का १३८ र H1 का ३७ सङ्क्रमित पनि पुष्टि भएका छन् ।
उत्तर प्रदेशमा ३३७, हरियाणामा ११९ र पञ्जाबमा ९३ जना स्वाइन फ्लु सङ्क्रमित भेटिएका छन् । उत्तर प्रदेशमा अगस्ट २० सम्म पुष्टि भएका संक्रमितमध्ये धेरैजसो राष्ट्रिय राजधानी क्षेत्र आसपासका रहेका छन् । मेरठ, गाजियाबाद र गौतमबुद्ध नगरका ११ सङ्क्रमित उपचाररत रहेको जनाइएको छ ।
महाराष्ट्रको मुम्बईमा पनि अगस्ट १५ सम्म H1N1 का ३०९ सङ्क्रमित भेटिएका छन् । गत वर्ष सोही अवधिमा ७२ सङ्क्रमित मात्रै थिए । यस वर्ष मुम्बईमा सङ्क्रमितको सङ्ख्या ४ गुणाभन्दा बढी भएको छ । छत्तीसगढमा पनि १ जना सङ्क्रमित भेटिएको जनाइएको छ ।