गोरखा । सवारी नियम उल्लघन गर्ने ५१० सवारी साधन कारवाहीमा परेका छन् ।
जिल्लाको विभिन्न क्षेत्रमा गरी उक्त संख्यामा सवारी साधन कारवाहीमा परेको जिल्ला ट्राफिक प्रहरी कार्यालय गोरखाका ईन्चाज तथा प्रहरी नायव निरिक्षक एक नारायण खनालले बताए ।
कारवाहीमा परेका मध्य सबैभन्दा बढी २ पाग्रे सवारी साधन रहेका छन् । ईन्चाज खनालका अनुसार साउन महिना मात्रै २२५ वटा २ पाग्रे सवारी साधन कारवाहीमा परेको हो । कारवाहीबाट १ लाख ८९ हजार राजश्व संकलन भएको छ ।
साउन महिनामा नै ११० वटा जिप तथा कार समेत कारवाहीमा परेका छन् । उनीहरुबाट १ लाख ९ हजार राजश्व संकलन भएको पनि ईन्चाज खनालले जानकारी दिए ।
त्यस बाहेक पनि ७१ वटा यात्रु बाहक बस, ६० वटा ट्रक तथा टिपर, ३७ ट्याक्टर र ७ अन्य सवारी साधन समेत कारवाहीमा परेका छन् ।
कारवाहीमा परेका बसबाट ६५ हजार ५००, ट्रक तथा टिपरबाट ५७ हजार, ट्याक्टरबाट २७ हजार र अन्य सवारी साधनबाट ४ हजार ५०० रुपैयाँ राजश्व संकलन भएको जिल्ला ट्राफिक प्रहरी कार्यालयले जानकारी दिएको छ ।
साउन महिनामा कारवाहीमा परेका कुल ५१० सवारीबाट कार्यालयले कुल ४ लाख ५२ हजार राजश्व संकलन गरेको छ ।
कार्यालयले अधिल्लो बर्षको सोही अवधिमा ५३५ सवारी कारवाहीमा परेको र त्यसबाट कुल ४ लाख ९७ हजार राजश्व संकनल गरेको थियो ।
कारवाहीमा परेका सवारी साधनले आवश्यक कागजात नबोकी हिडेको, ओभर लोड लिएर हिडेको, सवारी चालक अनुमती पत्र बिना सवारी चलाएकाहरु परेको पनि कार्यालयले जनाएको छ ।