गाेरखा । काठमाडौं महानगरपालिका-१४ गाङखेलबाट हिजाे सशस्त्र प्रहरीले ठुलो परिमाणको लागुऔषध ३ जनालाई नियन्त्रणमा लिएको छ ।
नियन्त्रणमा लिईएकाहरुमा भारत घर बताउने २६ वर्षीय राकेश कुमार शाह, बारा जिल्ला कलैया-५ घर भएका २१ वर्षीय नौसाद अन्सारी र ओखलढुङ्गाको मानेभञ्ज्याङ-५ घर भई हाल ललितपुर महालक्ष्मी थान- ६ बस्ने २४ वर्षीय दिपक राई भएकाे सशस्त्र प्रहरी बल नेपालका सशस्त्र प्रहरी नायव उपरिक्षक एवं सूचना अधिकारी शैलेन्द्र थापाले जानकारी दिए ।
उनका अनुसार भारतबाट अवैध रूपले नेपाल ल्याई उक्त लागूऔषध बेचबिखन गरिरहेको भन्ने बिशेष सुचनाको आधारमा सशस्त्र प्रहरी बल नेपाल इन्टेलिजेन्स व्यूरोको विशेष टोलीले नियन्त्रणमा लिएको हो ।
सशस्त्रकाे टोलीले उनीहरूको साथबाट ट्रामाडोल नामक लागुऔषध १ लाख २० हजार क्याप्सुल, टाटा कम्पनी को BAC 7017 नम्बर एउटा हात्ती गाडी, बागमती प्रदेश ०२-०६५ प ४४८९ नम्बरको मोटरसाइकल, ३ थान मोबाइल र नेपाली रूपैयाँ समेत बरामद गरेको छ ।
नियन्त्रणमा लिईएका तिनै जनालाई बरामद लागूऔषध, नेपाली रुपैयाँ, मोटरसाईकल र मोवाईल सेटसहित आवश्यक कारवाहीको लागि सम्बन्धित निकायमा बुझाउने प्रक्रियामा रहेको पनि सूचना अधिकारी थापाले बताए ।
