गाेरखा सदरमुकामकाे जेब्रा क्रसमा माेटरसाइकल पार्किङ गरेपछी ह्विललक लगाउदै ट्राफिक प्रहरी
गोरखा । जिल्ला ट्राफिक प्रहरी कार्यालय गोरखाले अघिल्लो बर्षको तुलनामा गत आर्थिक बर्षको राजश्वमा झण्डै ५० प्रतिशत कमी आएको छ ।
गत आर्थिक वर्ष ०८२–०८३ मा कार्यालयले जिल्ला भर सवारी साधनको कारवाहीबाट ५५ लाख १५ हजार ५०० रुपैयाँ राजश्व संकलन गरेको जिल्ला इन्चार्ज प्रहरी नायव निरिक्षक सुरज अर्यालले बताए ।
‘अघिल्लो आर्थिक वर्षमा जिल्लाको विभिन्न स्थानमा सवारी कारवाहीबाट करोड बढी संकलन भएको थियो’ उनले भने ‘गएको आर्थिक बर्षमा ५५ लाख हाराहारीमा संकलन भएको छ ।’
कार्यालयले उपलब्ध गराएको तथ्यांक अनुसार अघिल्लो आर्थिक वर्ष ०८१–०८२ मा ट्राफिक नियम उल्लंघन गर्ने सवारीबाट १ करोड ७ लाख ७१ हजार १ रुपैयाँ संकलन भएको थियो ।
राजश्वमा कमी आउनुका कारण सवारी चालकहरुमा सचेतना बढेको इन्चार्ज अर्यालले दावी गरे । उनका अनुसार गएको आर्थिक वर्षमा कार्यालयले जिल्लाको धेरै जसो स्थानमा सचेतना कार्यक्रम चलाएको र सोही कारण कारवाहीमा कमी आएको र राजश्व संकलन पनि कम भएको हो ।
कार्यालयका अनुसार गएको आर्थिक बर्षमा सबैभन्दा धेरै २ पाँग्रें सवारी साधन कारवाहीमा परेको थियो । २ हजार ३७० मोटरसाइकल तथा स्कुटर कारवाहीबाट १९ लाख ५५ हजार, १ हजार ३०४ वटा कार तथा जिपबाट ११ लाख ४३ हजार ५०० रुपैयाँ राजश्व संकलन भएको थियो ।
त्यस्तैगरी, १ हजार २०४ वटा ट्रक तथा टिपरबाट ११ लाख ६२ हजार ५०० रुपैयाँ, ८८३ वटा बसबाट ८ लाख १० हजार, ४५५ वटा ट्याक्टरबाट ३ लाख ६९ हजार र ९५ वटा टेम्पो तथा अन्य सवारीबाट ६५ हजार ५०० रुपैयाँ राजश्व संकलन भएको हो ।
कारवाहीमा परेको अधिकांक सवारी साधनले कागजपत्र दुरुस्त नराखेको, चालकले मापसे तथा लापसे गरेको, यात्रु संग बढी भाडा असुलउपर गरेको, सवारी चलाउदा अनुमती पत्र नलिकन चलाएको तथा विभिन्न ट्राफिक नियम उल्लंघन गरेका थिए ।
कार्यालयले उपलब्ध गराएको तथ्यांक अनुसार आव ०८१–०८२ मा ११ हजार ४३ वटा विभिन्न प्रकारका सवारी साधन कारवाहीमा परेका थिए ।