गोरखा । मनाङमा चाेरी गरेकाे आराेपमा गोरखाका १ जना युवकलाई प्रहरीले पक्राउ गरेको छ ।
मनाङ निस्याङ गाउँपालिकामा चोरी गरी फरार भएकाे आराेपमा प्रहरीले गाेरखा, धार्चे गाउँपालिका-६ निवासी २३ वर्षीय रुबिन गुरुङलाई पक्राउ गरेकाे हाे ।
मनाङकाे निस्याङ गाउँपालिका-९ स्थित खाङसारमा रहेको छेता गुरुङको पसलमा नगद तथा विभिन्न धनमाल चोरी गरी फरार भएकाे आराेपमा गुरुङलाई प्रहरीले पक्राउ गरेको जनाएकाे छ ।
मनाङ प्रहरीका अनुसार आराेपित गुरुङले गत २०८२ साल कात्तिक २२ पसलमा कोही नभएको अवस्थामा धनमाल र नगद चोरी गरी फरार भएका थिए ।
चोरीको घटनापछि खोजतलास तीव्र पारेको प्रहरी टोलीले निरन्तरको प्रयासपछि उनलाई २०८३ साल साउन ३ गते नियन्त्रणमा लिन सफल भएको हो ।
पक्राउ परेका गुरुङमाथि आवश्यक अनुसन्धान तथा कानुनी प्रक्रिया पुरा गरी मनाङ जिल्ला अदालतमा पेस गरिएकोमा अदालते पुर्पक्षका लागि थुनामा पठाउने निर्णय भएको मनाङ प्रहरीले जनाएको छ ।