एजेन्सी । ‘गडजिल्ला भर्सेस कङ’ चलचित्रकी अभिनेत्री केली हटलको १८ वर्षको उमेरमा मंगलबार कार दुर्घटनामा परेर निधन भएको छ । उनको निधनको खबर उनका बुबा जोसुआ हटलले फेसबुक लाइभस्ट्रिम मार्फत सार्वजनिक गरेका हुन् ।
भेराइटीका अनुसार उनका बुबाले टीएमजीसँग कुरा गर्दै म्यारील्यान्डमा भएको कार दुर्घटनामा छोरीको मृत्यु भएको र शव बुझ्न टेक्ससबाट आफू त्यहाँ जाँदै गरेको पुष्टि गरेका छन् । हटल विद्यार्थीको रूपमा अध्ययनरत टेक्सस स्कुल फर द डेफले पनि सामाजिक सञ्जालमा एक वक्तव्य जारी गर्दै यस दुःखद खबरको पुष्टि गरेको छ । हटल र उनका बुबा दुवैले कान सुन्दैन थिए ।
टेक्सस स्कुल फर द डेफको पोस्टमा भनिएको छ, ‘हाम्रा टीएसडी सिनियर विद्यार्थीहरूमध्येकी एक केली हटलको हिजो म्यारील्यान्डको फ्रेडरिकमा भएको कार दुर्घटनामा दुःखद निधन भएको हृदयविदारक खबर साझा गर्दा हामीलाई अत्यन्तै दुःख लागेको छ । यस कठिन समयमा हाम्रो सहानुभूति केलीका परिवार, साथीभाइ, सहपाठी र उनलाई चिन्ने तथा माया गर्ने सबैसँग छ । यो समयमा हामीसँग धेरै सीमित जानकारी छ र सबैलाई केलीको परिवारको गोपनीयताको सम्मान गर्न तथा दुर्घटनाको परिस्थितिबारे अड्कलबाजी नगर्न अनुरोध गर्दछौँ ।’
हटल सन् २०२१ को ‘गडजिल्ला भर्सेस कङ’ र २०२४ को ‘गडजिल्ला एक्स कङस् द न्यु एम्पायर’ मा जिया नामक पात्रको भूमिकाका लागि परिचित छिन् । फिल्ममा उनी एक अनाथ बहिरी बालिकाको भूमिकामा थिइन्, जसको कङसँग गहिरो सम्बन्ध हुन्छ र डाक्टर एलेन एन्ड्र्युज (रिबेका हल) ले उनलाई संरक्षण दिन्छिन् ।
‘गडजिल्ला एक्स कङः द न्यु एम्पायर’ का लागि हटल सर्वोत्कृष्ट युवा कलाकारको रूपमा स्याटर्न अवार्डका लागि मनोनीत समेत भएकी थिइन् ।