एजेन्सी । अमेरिका र इरानबिचको युद्ध पुन: चर्किएको छ । युद्धविरामसम्बन्धी सम्भझाैा भएको १ महिनापछि पुनः सुरु भएको द्वन्द्वमा अमेरिकाले लगातार १०औँ रात इरानका विभिन्न क्षेत्रमा हवाई आक्रमण गरेको छ ।
इरानको बन्दर अब्बास, सिरिक, केश्म टापु, चाबहार र कोनारक क्षेत्रमा विस्फोट भएका छन् । मंगलबार बिहान इरानको दक्षिणपश्चिमी शहर शिराजमा पनि शक्तिशाली विस्फोटको आवाज सुनिएको इरानको सरकारी प्रसारक आईआरआईबीले जनाएको छ ।
यता, इस्फहान प्रान्तका अधिकारीहरूले इस्फहान क्षेत्रमा कुनै पनि आक्रमण वा विस्फोट नभएको बताएका छन् । बुसेहर प्रान्तका गभर्नरले भने सुनिएका विस्फोटका आवाज वायु रक्षा प्रणाली सक्रिय हुँदा आएको बताएका छन् ।
साता दिनमा ३ अमेरिकी सैनिककाे मृत्यु
अमेरिकी राष्ट्रपति डोनाल्ड ट्रम्पले इरानलाई अमेरिकी सैनिकको मृत्युको धेरै गुणा ठूलो मूल्य चुकाउनुपर्ने चेतावनी दिएका छन् । पछिल्लो १ सातामा कम्तीमा ३ अमेरिकी सैनिक मारिएपछि अमेरिका थप आक्रामक बनेको हो ।
ह्वाइट हाउसले जारी गरेको वक्तव्यअनुसार राष्ट्रपतिले आदेश नदिएसम्म इरानमाथिका सैन्य आक्रमण जारी रहनेछन् । यद्यपि दुवै देशबीच कूटनीतिक संवाद पनि निरन्तर भइरहेको अमेरिकी प्रशासनले जनाएको छ ।
