एजेन्सी । भारतीय प्रधानमन्त्री नरेन्द्र मोदीले हरियाणाको जिन्द रेलवे स्टेशनबाट भारतको पहिलो तथा विश्वकै सबैभन्दा लामो हाइड्रोजनबाट चल्ने रेलको उद्घाटन गरेका छन् ।
जिन्द–सोनीपत मार्गमा सञ्चालनमा आएको यो रेल १० डिब्बा भएको विश्वकै सबैभन्दा लामो हाइड्रोजन रेल भएको भारतीय सरकारको भनाइ छ । रेलले करिब ८९ किलोमिटर दूरी करिब २ घण्टामा पार गर्नेछ र बीचमा १२ वटा स्टेशनमा रोकिनेछ ।
उद्घाटन समारोहलाई सम्बोधन गर्दै प्रधानमन्त्री मोदीले अन्य देशमा ३ वा ४ डिब्बाका मात्र हाइड्रोजन रेल सञ्चालनमा रहेको उल्लेख गर्दै भारतले १० डिब्बा र ३ हजार २०० हर्सपावर क्षमताको रेल निर्माण गरेर विश्वमा नयाँ पहिचान बनाएको छ ।
हाइड्रोजन रेल धुवाँरहित मात्र नभई ‘मेक इन इन्डिया’ अभियानको सफल उदाहरण भएको दाबी पनि उनले गरे । उनका अनुसार रेल भारतीय इन्जिनियरहरूले डिजाइन गरेका हुन् भने यसको निर्माण भारतीय कम्पनीले गरेको हो ।
