एजेन्सी । इरानको इस्लामिक रिभोलुसनरी गार्ड कर्प्स (आईआरजीसी)ले स्ट्रेट अफ होर्मुज क्षेत्रमा २ वटा सुपरट्यांकरमाथि आक्रमण गरी सञ्चालन अक्षम बनाएको दाबी गरेको छ ।
आईआरजीसीले टेलिग्राममार्फत जारी गरेको विज्ञप्तिमा ती २ ट्यांकरले आफ्नो नेभिगेसन प्रणाली बन्द गरेको, इरानी अधिकारीहरूको चेतावनी बेवास्ता गरेको तथा स्ट्रेटमा बिछ्याइएको बारुदी मार्ग हुँदै अघि बढ्ने प्रयास गरेपछि उनीहरूलाई निशाना बनाइएको उल्लेख गरेको छ ।
आईआरजीसीको यो दाबी संयुक्त अरब इमिरेट्स (यूएई)का २ तेल ट्यांकरमाथि इरानी मिसाइल प्रहार भएको घटनापछि आएको हो ।
यूएईको रक्षा मन्त्रालयका अनुसार अल बहिया र मोम्बासा नामका २ ट्यांकर ओमानको क्षेत्रीय जलक्षेत्रमा रहेका बेला इरानी मिसाइल प्रहार भएको थियो । उक्त घटनामा मोम्बासा ट्यांकरमा कार्यरत १ जना भारतीय चालकदल सदस्यको मृत्यु भएको थियाे ।
आईआरजीसीले भने उसले आक्रमण गरेको दाबी गरेका ट्यांकरको नाम सार्वजनिक गरेको छैन । साथै ती ट्यांकर कुन देशको झण्डामुनि सञ्चालन भइरहेका थिए वा आक्रमण कहिले गरिएको थियो भन्नेबारे पनि कुनै विवरण दिएको छैन ।