गोरखा । पालुङटार नगरपालिका–४, बाह्रपिर्केमा निर्माण सम्पन्न भएको पशु सेवा तथा कृषि विकास शाखाको नवनिर्मित भवन हस्तान्तरण गरिएको छ ।
नेपाल सरकार, कृषि तथा पशुपन्छी विकास मन्त्रालय अन्तर्गत ग्रामीण उद्यम तथा आर्थिक विकास आयोजना (RUDEP) को आर्थिक तथा प्राविधिक सहयोगमा निर्मित भनव आज एक कार्यक्रम बिच हस्तान्तरण गरिएकाे हाे ।
२ करोड ५५ लाख रुपैयाँको लागतमा निर्माण सम्पन्न भएकाे उक्त भवन पालिका प्रमुख विवस चिन्तनले उद्घाटन गरेर हस्तान्तरण गरीएकाे पालिकाले जनाएकाे छ ।
भवन हस्तान्तरण गर्दै नगर प्रमुख चिन्तनले नवनिर्मित भवन भौतिक संरचना मात्र नभई पालुङटारका किसानलाई गुणस्तरीय, सहज र प्रभावकारी सेवा प्रदान गर्ने महत्वपूर्ण आधार भएको बताए । उनले कृषि तथा पशुपालन क्षेत्रको आधुनिकीकरण, उत्पादन तथा उत्पादकत्व वृद्धि, मूल्य शृङ्खला विकास र आत्मनिर्भर स्थानीय अर्थतन्त्र निर्माणका लागि नगरपालिका निरन्तर क्रियाशील रहेको बताउँदै प्राप्त पूर्वाधारको संरक्षण, सदुपयोग र प्रभावकारी सेवा प्रवाहमा सबैको साझा जिम्मेवारी रहने धारणा व्यक्त गरे ।
कार्यक्रममा नगर उपप्रमुख वन्दना पाण्डेले कृषि र पशुपालनलाई नगरपालिकाको आर्थिक विकासको प्रमुख आधार भएकाे उल्लेख गर्दै किसानलाई समयमै प्राविधिक सेवा, प्रविधि हस्तान्तरण तथा उत्पादनमुखी कार्यक्रम प्रभावकारी रूपमा सञ्चालन गर्न यस भवनले महत्वपूर्ण भूमिका खेल्ने बताइन । उनले स्थानीय उत्पादन वृद्धि, रोजगारी सिर्जना तथा कृषिको व्यवसायीकरणमा नगरपालिकाको प्रतिबद्धता दोहोर्याउँदै किसानमैत्री कार्यक्रमलाई थप सुदृढ बनाइने धारणा राखिन ।
कार्यक्रममा जनप्रतिनिधि, विभिन्न सरकारी कार्यालयका प्रमुख तथा प्रतिनिधि, कर्मचारी, कृषि तथा पशुपालन व्यवसायी किसान, स्थानीय बुद्धिजीवी, सञ्चारकर्मी तथा सरोकारवालाहरूको सहभागिता रहेको थियो ।
नव निर्मित कार्यालय भवन बाट कृषि तथा पशु सेवा सम्बन्धी सेवा प्रवाह थप व्यवस्थित, प्रभावकारी, गुणस्तरीय र सेवाग्राहीमैत्री हुने विश्वास नगरपालिकाले गरेकाे छ ।