एजेन्सी । अमेरिकी सेनाले इरानमाथि गर्दै आएको पछिल्लो शृङ्खलाको आक्रमण हाललाई सकिएको बताएको छ । अमेरिकी सेन्ट्रल कमान्ड (सेन्टकम) ले इरानमाथिको ‘नयाँ चरणको आक्रामक हमला पूरा गरेको’ जनाएको हो ।
स्ट्रेट अफ होर्मुजबाट हुने अन्तर्राष्ट्रिय पानीजहाजको आवतजावतमा इरानले गर्दै आएको आक्रमणलाई रोक्न यस्तो कदम चालिएको सेन्टकमको भनाइ छ । यसका लागि ‘विभिन्न स्थानका दर्जनौँ निसानामा सटिक हतियार प्रहार गरिएको’ विज्ञप्तिमा उल्लेख छ ।
सेन्टकमले इरानको ‘हवाई रक्षा प्रणाली, तटीय राडार स्थल, क्षेप्यास्त्र र ड्रोन क्षमता तथा साना डुङ्गाहरू’ लाई निसाना बनाएको जनाएको छ । आक्रमणमा अमेरिकी लडाकु विमान, नौसेनाका जहाज, एकतर्फी आक्रमण गर्ने हवाई ड्रोन र पहिलोपटक समुद्री ड्रोनसमेत प्रयोग गरिएको थियो ।
अमेरिकी सेनाले आक्रमण सकिएको घोषणा गर्नुभन्दा केही बेरअघि मात्र इरानको दक्षिणी होर्मोज्गान प्रान्तस्थित बन्दर अब्बासमा कम्तीमा २ वटा शक्तिशाली विस्फोटको आवाज सुनिएको इरानी समाचार एजेन्सी इर्नाले जनाएको छ ।
यसैबिच, इरानको इस्लामिक रिभोलुसनरी गार्ड कोर्प्स (आईआरजीसी) ले अमेरिकी आक्रमणको जवाफ दिने क्रम सुरु गरेको छ । आईआरजीसीले पहिलो चरणअन्तर्गत जोर्डनस्थित प्रिन्स हसन हवाई अखडामा क्षेप्यास्त्र र ड्रोन आक्रमण गरेको छ । उक्त आक्रमणबाट त्यहाँ रहेका इन्धन भण्डार र हतियार राख्ने गोदाममा आगो लागेको बताइएको छ ।
होर्मुज जलमार्गमा ट्र्याकिङ प्रणाली बन्द गरेर अवैध रूपमा यात्रा गरेको आरोपमा इरानी नौसेनाले २ वटा जहाज रोकेपछि अमेरिकाले इरानी तटीय सैन्य अखडामा आक्रमण गरेको थियो । सोही अमेरिकी कदमको जवाफमा जोर्डनमा आक्रमण गरिएको इरानको दाबी छ ।
त्यसैगरी, आईआरजीसीले आफ्नो प्रत्याक्रमणको दोस्रो चरणअन्तर्गत बहराइनको सेख इसा हवाई अखडाका विभिन्न संरचनामा निसाना बनाएको दाबी गरेको छ । एक विज्ञप्ति जारी गर्दै आईआरजीसीले आफ्नो एयरोस्पेस बलले हेलिकोप्टर मर्मत केन्द्र, पी–८ विमान राखिने ह्याङ्गर र अमेरिकी सेनाको ड्रोन कमान्ड एन्ड कन्ट्रोल सेन्टरमा प्रहार गरेको जनाएको छ ।
अमेरिकाले इरानमाथि निरन्तर सैन्य कारबाही गरेपछि त्यसको जवाफमा यस्तो आक्रमण गरिएको र यो क्रम अझै जारी रहने इरानले स्पष्ट पारेको छ । इरानको नुर न्युज एजेन्सीले पनि इरानी सेना र आईआरजीसीले ‘क्षेत्रीय रूपमा रहेका शत्रुहरूका अखडामा’ ठुलो परिमाणमा क्षेप्यास्त्र र ड्रोन आक्रमण सुरु गरेको जनाएको छ ।
एक इरानी सैन्य अधिकारीलाई उद्धृत गर्दै नुर न्युजले विगत ४८ घण्टामा ‘शत्रुका गतिविधि’ पहिचान गरिएका स्थानहरूलाई लक्षित गर्दै कारबाही अघि बढाइएको उल्लेख गरेको छ ।
यसै बिच स्ट्रेट अफ होर्मुज हुँदै हुने ऊर्जा ढुवानीमा खतरा बढेपछि सोमबार कच्चा तेलको मूल्य ह्वात्तै बढेको छ । ग्रिनविच समय अनुसार राति ११:११ बजे सम्ममा ब्रेन्ट क्रुड फ्युचर्स २.३४ डलर अर्थात् ३.०८ प्रतिशतले बढेर ७८.३५ डलर पुगेको छ ।
यसैगरी अमेरिकी वेस्ट टेक्सास इन्टरमिडिएट क्रुड प्रतिब्यारेल २.२१ डलर अर्थात् ३.०९ प्रतिशतले बढेर ७३.६२ डलर पुगेको छ ।
खाडी क्षेत्रमा युद्ध चर्किँदै गएको र इरानले महत्त्वपूर्ण होर्मुज जलमार्ग बन्द गरेको दाबी गरेपछि सोमबार एसियाली सेयर बजार ओरालो लागेको छ ।