एजेन्सी । भारतको राजधानी दिल्लीमा लगातार भइरहेको वर्षाका बिच बुधबार साँझ रोहिणी क्षेत्रमा एक निर्माणाधीन ५ तले भवन भत्किएको छ । भवन भत्किदा १ जनाको मृत्यु भएको छ भने केही मानिसहरू भग्नावशेषमा पुरिएको आशंका गरिएको छ ।
यो दुर्घटना रोहिणीको सेक्टर–१६ स्थित ‘पकेट जी–५ एमसीडी स्कुल’ नजिकै भएको हो । रोहिणीका डीसीपीका अनुसार यो घटना साँझ ४ः२६ बजेको हो । उनले भने, ‘हामी घटनास्थलमै छौँ र उद्धार कार्यमा जुटिरहेका छौँ । अहिलेसम्म १ जनाको मृत्यु भएको पुष्टि भएको छ भने केही मानिसहरू अझै भग्नावशेषभित्र फसेको हुनसक्ने आशंका छ । हामीले १ जना घाइतेलाई सकुशल उद्धार गरेका छौँ र उद्धार कार्य जारी छ ।’
यसैबिच, उक्त क्षेत्रका काउन्सिलर प्रदीप मित्तलले ५ तले भवन भत्किँदा केही मानिस भग्नावशेषमुनि फसेको बताउँदै अहिले मुख्य ध्यान उद्धार कार्यमा केन्द्रित रहेको जनाएका छन् । उनले यस घटनाका लागि जो कोही जिम्मेवार पाइए पनि उनीहरूविरुद्ध कडाभन्दा कडा कानुनी कारबाही गरिने स्पष्ट पारेका छन् ।