गाेरखा। गोरखाको पालुङटार नगरपालिकाले पालिका भित्र अध्ययरत सबै बिद्यार्थीहरुको दुर्घटना बिमा गरिदिएको छ ।
पालिका भित्र अध्ययनरत ४ हजार ५८२ जना विद्यार्थीको सामूहिक दुर्घटना बीमा गरिदिएको पालिका अध्यक्ष विवश चिन्तनले बताए ।
नगरपालिकाभित्रका सामुदायिक विद्यालयमा अध्ययनरत उक्त संख्याका बिद्यार्थीहरुको लागी आइजिआई प्रुडेन्सियल इन्स्योरेन्स लिमिटेडबीच सम्झौता सम्पन्न भएको हो ।
नगरपालिकाको कार्यालयमा सम्पन्न सम्झौतामा प्रमुख प्रशासकीय अधिकृत शेरबहादुर बिसी र इन्स्योरेन्सका प्रतिनिधिले हस्ताक्षर गरेका छन् ।
सम्झौताअनुसार नगरपालिकाभित्रका सामुदायिक विद्यालयमा अध्ययनरत सबै विद्यार्थीको एक वर्षका लागि सामूहिक दुर्घटना बीमा कायम हुने छ ।
बिमा अवधिभर कुनै पनि विद्यार्थीले ७० हजार बरावरको बिमा सुविधा पाउने पनि अध्यक्ष चिन्तनले जानकारी दिए ।
सम्झौतामा बीमा दाबीका लागि आवश्यक कागजात, दुर्घटना वा उपचारसम्बन्धी प्रमाण, मृत्यु भएमा मृत्यु दर्ता प्रमाणपत्रलगायत आवश्यक कागजातका आधारमा प्रचलित कानुन र बीमा कम्पनीका नियमअनुसार दाबी भुक्तानी गरिने व्यवस्था गरिएको छ ।
नगरपालिकाले विद्यार्थीहरूको सुरक्षालाई प्राथमिकतामा राख्दै विद्यालयमा अध्ययनरत सबै विद्यार्थीलाई दुर्घटनाबाट हुन सक्ने आर्थिक जोखिम न्यूनीकरण गर्ने उद्देश्यले यो कार्यक्रम सञ्चालन गरेको जनाएको छ ।
यस कार्यक्रमबाट दुर्घटनामा परेका विद्यार्थी तथा उनका परिवारलाई आवश्यक आर्थिक सहयोग पुग्ने अपेक्षा नगरपालिकाले लिएको छ ।