तस्बिर : सुरेन लामिछाने
गोरखा । गोरखा सदरमुकामको १२ किलो बजारमा रहेको अस्थायी टहरा हटाउन अन्तिम पटक ७ दिनको म्याद दिएको छ ।
डिभिजन बन कार्यालय गोरखाले आज एक सूचना जारी गर्दै गोरखा नगरपालिका–११ को १२ किलो क्षेत्रको सामुदायिक बन भित्र निर्माण भएको टहरा हटाउन अन्तिम पटक ७ दिने म्याद दिएको डिभिजन बन अधिकृत मदन मोहन शाण्डिल्यले बताए ।
‘गोरखा जिल्ला गोरखा नगरपालिका वडा नं.११ स्थित १२ किलो क्षेत्रमा ओख्ले पाखा सामुदायिक बनक्षेत्र भित्र रहेका अवैध संरचनाहरु खाली गराउन सरोकारवाला निकायहरुबाट पटक पटक अनुरोध हुदा समेत उक्त संरचनाहरु सम्बन्धित ब्यक्तिहरुबाट नहटाईए’ को सूचनामा भनिएको छ ।
सोही सूचनामा ‘बन ऐन २०७६ बमोजिम राष्ट्रिय बनक्षेत्रमा निषेधित कार्य गरेको पाइएकोले यो सूचना प्रकाशन भएको मितिले ७ (सात) दिन भित्र आफ्नो तर्फबाट हटाई बन क्षेत्र खाली गरिदिनुहुन सम्वन्धित ब्यक्ति÷संस्थाको जानकारीको लागी यो अन्तिम सुचना प्रकाशित गरिएको छ’ भनिएको छ ।
जारी सुचना अनुसार अब उक्त क्षेत्रमा टहरा बनाएर बस्ने जो कोहीले पनि असार ३० गते सम्ममा टहरा हटाउनु पर्ने छ । उक्त दिनसम्म पनि टहरा नहटाए भोलीपल्टैबाट बल पूर्वक बन क्षेत्र खाली गराउने गरी डिभिजन बन कार्यालयले तयारी गरेको पनि प्रमुख शाण्डिल्यले बताए ।
खाली गराउने क्रममा बाधा बिरोध गर्ने ब्यक्ति तथा संस्थालाई बन ऐन २०७६ अनुसार हदैसम्मको कारवाही गरिने पनि उनले जानकारी दिए ।
