एजेन्सी । पोर्चुगलको उत्तरी भागमा फैलिएको जङ्गलको आगो नियन्त्रण गर्न शनिबार १ हजारभन्दा बढी दमकलकर्मीलाई तैनाथ गरिएको छ ।
देश अत्यधिक गर्मीको सामना गरिरहेको समय जङ्गलको ठुलो क्षेत्रमा डढेलो फैलिँदा तापक्रम बढ्ने जोखिम थप बढेको छ ।
केही ठाउँमा तापक्रम ४४ डिग्री सेल्सियससम्म पुग्ने अनुमानका बिच बुधबार भिसेउ जिल्लामा सुरु भएको यो आगोले अहिलेसम्म २५ हजार एकड क्षेत्र जलाएको उद्धारमा तैनाथ अधिकारीले बताएका छन् ।
जङ्गली आगो नियन्त्रण गर्न १ हजार १०० दमकलकर्मी, ३८० वटा दमकल गाडी र ८ वटा विमान तथा हेलिकोप्टरले सहयोग गरिरहेका छन् ।
डढेलो नियन्त्रण गर्न पोर्चुगलले युरोपेली सहयोग मागेपछि स्पेनको सैन्य टोलीले पनि डढेलो निभाउन सहयोग गरिरहेको छ ।
डढेलोमा परी अहिलेसम्म ९ जना घाइते भएका छन्, जसमध्ये २ सर्वसाधारणको अवस्था गम्भीर छ ।
सुरक्षाका लागि सरकारले जङ्गल क्षेत्रमा प्रवेश निषेध गर्नु र ग्रामीण क्षेत्रमा केही प्रकारका मेसिनरी प्रयोगमा प्रतिबन्ध लगाउनुजस्ता विशेष उपायहरू अपनाएको छ ।
