तस्बिर एआई
गाेरखा । गोरखा सदरमुकाममा लागुऔषध सेवन गरी सार्वजनिक सवारी साधन चलाएकाे आराेपमा चालक र सहचालकलाई प्रहरीले नियन्त्रणमा लिएको छ ।
जिल्ला प्रहरी कार्यालय गोरखा र जिल्ला ट्राफिक प्रहरी कार्यालय गोरखाको संयुक्त चेकिङ टोलीले उनीहरूलाई लागुऔषध सेवन गरेर सवारी चलाएको आराेपमा पक्राउ गरेकाे हाे ।
असार ११ गते अर्थात बिहीबार दिउँसो २:१५ बजेको समयमा गोरखा नगरपालिका-४ काे ढुङ्गाडेस्थित गोरखा–आरुघाट सडक खण्डमा विशेष चेकिङका क्रममा उनिहरुलाई प्रहरीले पक्राउ गरेको जिल्ला प्रहरी कार्यालय गाेरखाका प्रहरी नायब उपरिक्षक एवं सूचना अधिकारी राजकुमार श्रेष्ठले बताए ।
चेक जाँचमा औषध सेवन किटमार्फत चेक जाँच गर्दा उनीहरुले लागुऔषध सेवन गरिएकाे देखिएपछी नियन्त्रणमा लिएकाे उनले जानकारी दिए ।
पक्राउ पर्नेहरूमा गोरखा जिल्ला भिमसेन थापा गाउँपालिका-४ का चालक राम बहादुर लामिछाने र गोरखा नगरपालिका-११ बाह्रकिलोका सहचालक कुमार परियार रहेका छन् ।
प्रहरीले नियन्त्रणमा लिएका दुवै जनालाई आवश्यक कानुनी कारबाहीका लागि प्रक्रिया अगाडि बढाएको छ । नियन्त्रणमा लिइएका उनीहरूलाई थप अनुसन्धानका लागि शुक्रबार गोरखा जिल्ला अदालतबाट ६ दिनको म्याद लिएर प्रहरी हिरासतमा राखि अनुसन्धान थालिएकाे प्रनाउ तथा सूचना अधिकारी श्रेष्ठले जानकारी दिए ।
सार्वजनिक यातायात जस्तो संवेदनशील क्षेत्रमा चालक र सहचालक नै लागुऔषधको नशामा भेटिएपछि यात्रुहरूको सुरक्षालाई लिएर स्थानीय स्तरमा सजगता र चिन्ता थप बढेको छ ।
