एजेन्सी । जापानको उत्तरी तटीय क्षेत्रमा बिहीबार बिहान मानिसहरूको आवतजावत बढी हुने व्यस्त समयमा एक शक्तिशाली भूकम्प गएको छ। जापानको मौसम विज्ञान एजेन्सीका अनुसार भूकम्प शक्तिशाली भए पनि यसबाट सुनामी आउने कुनै खतरा भने छैन ।
इवाते प्रान्तको पूर्वी तटीय क्षेत्रलाई केन्द्रविन्दु बनाएर गएको उक्त भूकम्पको तीव्रता सुरुमा ६.९ म्याग्निच्युड मापन गरिए पनि पछि परिमार्जन गर्दै ७.२ म्याग्निच्युड रहेको जनाइएको छ ।
यो भूकम्प जमिनको सतहबाट करिब ५० किलोमिटर (३० माइल) गहिराइमा गएको थियो । अमेरिकी भूगर्भ सर्वेक्षण (युएसजिएस) ले पनि सो भूकम्प रेकर्ड गर्दै यसको तीव्रता ६.९ म्याग्निच्युड रहेको उल्लेख गरेको छ ।
पछिल्ला महिनाहरूमा यस क्षेत्रमा लगातार शक्तिशाली भूकम्पहरू गइरहेका छन् । यसअघि गत डिसेम्बर महिनामा पनि यही क्षेत्रमा गएको भूकम्पका कारण हप्तादिन लामो ‘मेगा-भूकम्प’ को पूर्वसतर्कता चेतावनी जारी गरिएको थियो ।
जापानको अग्नि तथा विपद् व्यवस्थापन एजेन्सीका अनुसार यो भूकम्पका कारण देशका उत्तरी प्रान्तहरू ओमोरी र इवातेमा गरी कम्तीमा ८ जना घाइते भएका छन् ।
घाइते हुनेहरूमा धेरैजसो लडेर वा माथिबाट खसेका वस्तुहरूले लागेर चोटपटक लागेका मानिसहरू छन् । जापानी सञ्चारमाध्यमहरूका अनुसार कसैको पनि ज्यान जाने गरी गम्भीर चोट लागेको रिपोर्ट भने आएको छैन ।
भूकम्पको धक्का राजधानी टोकियोसम्म पनि सामान्य रूपमा महसुस गरिएको थियो । भूकम्प लगत्तै जापानी प्रधानमन्त्री सानाए ताकाइचीले पत्रकारहरूसँग कुरा गर्दै आफ्नो सरकारको आकस्मिक टोलीले ‘नागरिकको जीवनलाई पहिलो प्राथमिकतामा राखेर’ काम गरिरहेको बताएकी छन् ।
उनले अहिले भूकम्पको क्षतिको विवरण संकलन भइरहेको र आवश्यकता अनुसार उद्धार तथा राहत कार्यका लागि सम्पूर्ण तयारी पूरा गरिएको जानकारी दिइन् ।