एजेन्सी । युक्रेनले रूसको राजधानीमा हमला गरेको छ । बिहीबार राजधानी मस्कोमा रहेको प्रमुख तेल प्रशोधन केन्द्रमा युक्रेनले ड्रोन हमला गरेको अन्तर्राष्ट्रिय सञ्चारमाध्यमहरूले जनाएकाे छ ।
ड्रोन हमलापछि तेल प्रशोधन केन्द्रमा भीषण आगलागी भएको छ । विस्फोट यति शक्तिशाली थियो कि तेल भण्डारण ट्याङ्कीको विशाल गोलाकार ढकनी आकाशमा उडेको दृश्य सामाजिक सञ्जालमा भाइरल छ ।
तेल प्रशोधन केन्द्रमाथि युक्रेनी हमला ३ दिनभित्र दोस्रो पटक भएको हो । युक्रेनी ड्रोनहरूले रुसी हवाई प्रतिरक्षा प्रणाली छल्दै क्रेमलिनबाट करिब १६ किलोमिटर टाढा रहेको उक्त प्रशोधन केन्द्रलाई निशाना बनाएका थियाे । घटनापछि बाक्लो कालो धुवाँले मस्कोको आकाश ढाकेको थियो ।
युक्रेनका विदेशमन्त्री आन्द्री सिबिहाले सामाजिक सञ्जाल एक्समा लेख्दै आक्रमणलाई रुसविरुद्धको सन्देशका रूपमा व्याख्या गरेका छन् ।
युक्रेनले रुसको भित्री भूभागमा गरिरहेका लगातारका आक्रमणहरूले युद्धको दिशा आफ्नो पक्षमा मोडिँदै गएको दाबी गरेको छ ।
राष्ट्रपति भोलोदिमिर जेलेन्स्कीले यही सन्देश हालै फ्रान्समा सम्पन्न जी–७ शिखर सम्मेलनमा अमेरिकी राष्ट्रपति डोनाल्ड ट्रम्पसहित अन्य नेताहरूसमक्ष पनि राखेका थिए । तर क्रेमलिनले युक्रेनको दाबी अस्वीकार गरेको छ ।
