एजेन्सी । भारत सरकारले अबदेखी कफ सिरप डाक्टरको प्रेस्क्रिप्सनबिना किन्न नपाइने व्यवस्था ल्याएको छ ।
गत वर्ष विषाक्त सिरपका कारण मध्यप्रदेशमा २६ जना बालबालिकाको ज्यान गएपछि भारतले औषधि खरिद तथा बिक्रीसम्बन्धी नियमहरू कडा पारेको हो ।
नयाँ व्यवस्थाअनुसार सिरपलाई अब ड्रग्स रुल्स, १९४५ अन्तर्गतको अनुसूची–केबाट हटाइएको छ । यस सूचीमा पहिले केही औषधिहरूलाई सीमित नियममा छुट दिइएको थियो, जसका कारण तिनलाई सामान्य पसलबाट पनि सजिलै किन्न सकिन्थ्यो ।
सरकारका अनुसार यो परिवर्तनले सिरपको अनुगमन, गुणस्तर नियन्त्रण र निगरानी प्रणाली अझ बलियो बनाउनेछ । अब सिरप उत्पादन गर्ने कम्पनी र बिक्री गर्ने विक्रेताले कडा लाइसेन्स र गुणस्तर मापदण्ड पालना गर्नुपर्नेछ ।
यो निर्णय लागु गर्नुअघि औषधि प्राविधिक सल्लाह बोर्डसँग परामर्श गरिएको र सार्वजनिक सुझाव पनि मागिएको सरकारले जनाएको छ ।
