गोरखा । सदरमुकाम भित्रको बिपी चोकदेखी मैदानसम्मको सडक स्तरोउन्नती हुने भएको छ । प्रदेश सरकार अन्तरर्गत रहेको पूर्वाधार बिकास कार्यालयले उक्त सडकको काम थालेको हो ।
कार्यालयले गोरखा नगरपालिका–७ र ५ जोडने उक्त सडकको लागि भ्याट बाहेक १ करोड १० लाख ४६ हजार ३३८ रुपैयाँ ४४ पैसामा ठेक्का लगाएको हो ।
सुजी निर्माण सेवा गोरखाले जिम्मा पाएको उक्त सडकको काम केही दिन अगाडीदेखी थालिएको छ ।
सुजी निर्माण सेवाका प्रोपाईटर सुवास कुमार श्रेष्ठका अनुसार कार्यालय संग यही जेठ ११ गते सम्झौता भए लगत्तै काम थालिएको र अबको साता दिन भित्रै काम सम्पन्न गर्ने गरी थालिएको जानकारी दिए ।
उनका अनुसार उक्त मार्गमा करिब १ किलो ४०० मिटर पिच र २४७ घन मिटर मेशिनरी वाल रहेको छ ।
निर्माण कम्पनीले वालको काम सकेर अहिले ग्रावेलको काम गरीरहेको छ । असार ८ गतेभित्र सक्ने गरी काम थालिएको पनि कम्पनीका प्रोपाईटर श्रेष्ठले जानकारी दिए ।
असफाल्ट पिच भएकोले सुरु गरेको २ दिनमा नै काम सक्ने पनि उनले जानकारी दिए । उनले भने ‘५ र ६ गतेसम्ममा ग्रावेलको सबै काम सक्ने र ७ र ८ गते पिचको काम सकिने छ ।’
कार्यालयले दिएको जानकारी अनुसार सम्झौता भएर काम छिटो सक्ने पहिलो कम्पनी हुने छ । ०८४ साल बैशाख १० गतेसम्म सम्झौता अवधी रहेको निर्माण कम्पनीले सम्झौता भएको महिना दिन भित्रै सबै काम सक्न लागेको हो ।
