एजेन्सी । अमेरिकाको दक्षिणी क्यालिफोर्नियास्थित एड्वर्ड्स एअर फोर्स बेसबाट उडान भर्ने बित्तिकै अमेरिकी वायुसेनाको एक बी-५२ बमवर्षक विमान दुर्घटनाग्रस्त हुँदा २ बोइङ कर्मचारीसहित ८ जनाको ज्यान गएको छ । सोमबार स्थानीय समय अनुसार बिहान ११:२० बजे विमान नियमित परीक्षण उडानमा रहेका बेला उक्त दुर्घटना भएको हो ।
दुर्घटना यति भयानक थियो कि त्यसपछि आकाशमा निकै माथिसम्म कालो धुवाँको मुस्लो देखिएको थियो, जुन माइलौँ टाढाबाट समेत स्पष्ट रूपमा देखिन्थ्यो ।
एअर फोर्स बेसका कर्नल जेम्स हेसले दिउँसो आयोजित पत्रकार सम्मेलनमा दुर्घटनालाई ठुलो त्रासदीको रूपमा वर्णन गर्दै ८ जना महान् अमेरिकीहरूलाई गुमाउनुपरेको बताएका छन् । उनले मृतकहरूमा सैन्य अधिकारी, सरकारी नागरिक कर्मचारी र सरकारी ठेकेदारहरू सम्मिलित मिश्रित टोली रहेको जानकारी दिए ।
प्रारम्भिक अध्ययन अनुसार दुर्घटनापछि कोही पनि जीवित बच्न सक्ने स्थिति नरहेको आधारहरू देखिएका छन् । मृतकका परिवारलाई घटनाबारे जानकारी गराइँदै गरेको र त्यसको २४ घण्टापछि मात्र उनीहरूको नाम सार्वजनिक गरिने कर्नल हेसले बताए ।
दुर्घटना पूर्ण रूपमा एड्वर्ड्स एअर फोर्स बेसको धावनमार्ग भित्रै सीमित रहेको र बेसले आफ्ना उडान अपरेसनहरू तत्कालका लागि स्थगित गरेको छ । उक्त विमान बेसको राडार आधुनिकीकरण कार्यक्रमलाई सहयोग पुर्याउने कार्यमा संलग्न रहेको र उडान भर्ने बित्तिकै खसेर आगोको डल्लोमा परिणत भएको थियो ।
यो एक लामो दूरीको रणनीतिक बमवर्षक विमान हो । जसले हालै अमेरिका र इजरायलको इरानसँगको युद्धका क्रममा बमबारी अभियानहरूमा समेत भाग लिइरहेको थियो ।
यो विशाल बमवर्षक विमान ५० हजार फिटको उचाइसम्म उड्ने क्षमता राख्दछ । यसले ३२ हजार किलोग्राम सम्मको वजन बोक्न सक्छ, जसमा सयौँ परम्परागत बम र ३२ वटा आणविक क्रुज मिसाइलहरू समावेश हुन सक्छन् । उडानकै क्रममा हावामै इन्धन भर्न सक्ने भएकाले यसको मारक क्षमताको दायरा असीमित मानिन्छ ।
