एजेन्सी । इजरायली प्रधानमन्त्री बेन्जामिन नेतान्याहुले अमेरिका र इरानबिच भएको सम्झौताका बाबजुद इजरायलको ‘सङ्घर्ष’ अझै समाप्त नभएको बताएका छन् ।
इजरायली पत्रकारहरूसँगको पत्रकार सम्मेलनमा बोल्दै उनले इरानविरुद्ध संयुक्त अमेरिका–इजरायल युद्ध सुरु गरेर आफूले इजरायललाई ‘आणविक विनाश’ को खतराबाट बचाएको दाबी गरे ।
नेतान्याहुले भने, “हाम्रो सङ्घर्ष अझै सकिएको छैन ।” लेबनानको प्रसङ्गमा बोल्दै उनले हिजबुल्लाहले इजरायललाई धम्की दिने गरेका ‘मध्य क्षेत्रहरू’ मा इजरायलले नियन्त्रण कायम गरेको बताए । “जस्तोसुकै मूल्य चुकाउनु परोस्, हामी सुरक्षा क्षेत्रमा रहिरहनेछौँ,” उनले भने ।
नेतान्याहुले इजरायलमाथि रहेको अस्तित्ववादी आणविक खतरा हटाउने आफ्नो लक्ष्य रहेको र त्यसमा आफू नचुकेको स्पष्ट पारे । उनले इरानलाई आणविक हतियार प्राप्त गर्नबाट रोक्न इजरायलले आवश्यक पर्ने जुनसुकै कदम चाल्ने प्रतिबद्धतासमेत दोहोर्याएका छन् ।