गाेरखा । आज विश्व रक्तदाता दिवस हो । ‘मानवताका लागि एक थोपा रगत, रक्तदान गरौँ, जीवन बचाऔँ’ नाराका साथ विश्वका विभिन्न मुलुकमा विविध कार्यक्रमका साथ यो दिवस मनाईरहदा गाेरखा सदरमुकाममा गाेरखा जेसिजले रक्तदान कार्यक्रम सम्पन्न गरेकाे छ ।
सुरक्षित रगत तथा रगतजन्य पदार्थको आवश्यकताबारे चेतना अभिवृद्धि गर्नुका साथै निःशुल्क तथा स्वेच्छिक रूपमा रक्तदान गर्ने रक्तदाताप्रति सम्मान व्यक्त गर्ने उद्देश्यले जेसिजले आज सदरमुकाममा रक्तदानकाे कार्यक्रम आयाेजना गरेकाे हाे ।
गाेरखा नगरपालिका-६ काे पुरानाे बरपार्कमा रहेकाे जेसिज प्रतिक्षालयमा आयाेजित रक्तदान कार्यक्रममा १५ जना युवाहरुले रक्तदान गरेकाे कार्यक्रम संयाेजक संदिप बयलकाेटीले जानकारी दिए ।
नेपाल रेडक्रस साेसाइटी जिल्ला शाखाकाे प्राविधक सहयाेगमा संकलित रगत ब्लड बैंक गाेरखालाई हस्तान्तरण गरिएकाे अध्यक्ष सुजित श्रेष्ठले बताए ।
विश्व स्वास्थ्य सङ्गठन (डब्ल्युएचओ) ले सार्वजनिक गरेको पछिल्लो तथ्याङ्कअनुसार विश्वव्यापी रूपमा सुरक्षित रगतको आपूर्ति सुधारतर्फ उल्लेखनीय प्रगति भए पनि सुरक्षित रगतमा पहुँचका दृष्टिले अझै ठूलो असमानता कायम छ । डब्लुएचओले सङ्कलन गरेको १३२ देशको तथ्याङ्कअनुसार सन् २०१३ देखि २०२३ सम्म विश्वभर रगत सङ्कलन करिब १९ प्रतिशतले वृद्धि भएको छ । सन् २०२३ मा प्राप्त अनुमानित १२ करोड रक्तदानमध्ये ८५ प्रतिशतभन्दा बढी योगदान स्वेच्छिक तथा निःशुल्क रक्तदाताबाट आएको छ ।