एजेन्सी । अमेरिकी राष्ट्रपति डोनाल्ड ट्रम्पले इरानसँगको युद्ध समाप्त भएको र २ देशबिच एक ‘महत्त्वपूर्ण सम्झौता’ हुन लागेको दाबी गरेका छन् ।
बिहीबार ओभल अफिसमा सञ्चारकर्मीहरूसँग कुरा गर्दै ट्रम्पले इरानसँगको द्वन्द्व समाधानका लागि एक बलियो समझदारी पत्र तयार भएको र यसले वर्षौंदेखिको तनाव अन्त्य गर्ने बताएका हुन् ।
राष्ट्रपति ट्रम्पका अनुसार इरानले कहिल्यै पनि आणविक हतियार नबनाउने शर्तमा सहमति जनाएको छ । उनले भने, ‘हामीले आज इरानसँगको युद्ध अन्त्य गरेका छौं । उनीहरू आणविक हतियार नराख्न सहमत भएका छन्, जुन हाम्रो मुख्य उद्देश्य थियो ।’
ट्रम्पले बिहीबार साँझका लागि तय गरिएका सैन्य आक्रमणहरू समेत रद्द गरेको जानकारी दिए । उनले यो सम्झौताको अन्तिम रूप दिन केही दिनमै युरोपमा हस्ताक्षर समारोह हुन सक्ने र त्यसमा सहभागी हुन उपराष्ट्रपति जेडी भान्स जान सक्ने समेत संकेत गरे । सम्झौता कार्यान्वयनमा आउनासाथ इरानमाथि लगाइएको सामुद्रिक नाकाबन्दी र स्ट्रेट अफ हर्मुज खुला गरिने ट्रम्पको भनाइ छ ।
यद्यपि, इरानले भने ट्रम्पको दाबीलाई पूर्ण रूपमा स्वीकार गरेको छैन । इरानी विदेश मन्त्रालयका प्रवक्ता इस्माइल बाघेईले सम्झौता भइसकेको भन्ने कुरालाई अड्कलबाजी मात्र भएको बताए ।
राज्य नियन्त्रित सञ्चारमाध्यमसँग बोल्दै उनले भने, ‘अहिलेसम्म इरानले कुनै पनि सम्झौताका बारेमा अन्तिम निर्णय लिएको छैन । कतार र पाकिस्तानले मध्यस्थता गरिरहेका छन्, तर अमेरिकी व्यवहारले कूटनीतिक प्रक्रियालाई प्रभावित पारिरहेको छ ।’ इरानले आफ्ना ‘रेड लाइन’ हरूमा कुनै सम्झौता नगर्ने स्पष्ट पारेको छ ।
ट्रम्पको यो अचानकको घोषणाले इजरायली प्रधानमन्त्री बेन्जामिन नेतन्याहुलाई पनि आश्चर्यमा पारेको बताइएको छ । ट्रम्पसँगको टेलिफोन संवादमा नेतन्याहुले इरानको आणविक पूर्वाधार ध्वस्त पार्ने र क्षेप्यास्त्र उत्पादनमा रोक लगाउने प्रतिबद्धताको प्रशंसा गरे पनि इजरायल यो प्रारम्भिक समझदारीको हिस्सा नरहेको स्पष्ट पारेको छ ।
तर युद्ध अन्त्यको समाचार सार्वजनिक भएसँगै अन्तर्राष्ट्रिय बजारमा कच्चा तेलको मूल्यमा गिरावट आएको छ भने अमेरिकी शेयर बजारमा उछाल आएको सीएनएनले समाचारमा उल्लेख गरेको छ ।
