गोरखा । गोरखाको पालुङटार नगरपालिकाले सार्वजनिक जग्गा संरक्षण तथा व्यवस्थापन अभियानलाई तीव्रता दिएको छ । यसै क्रममा नगरपालिका-७ को च्याङली बगरस्थित चर्चित ‘भाइरल चौर’ को नापजाँच गरी सार्वजनिक क्षेत्र छुट्याउने कार्य सम्पन्न भएको छ ।
मर्स्याङ्दी नदीको मनमोहक किनारमा अवस्थित यो रमणीय चौर पछिल्लो समय आन्तरिक पर्यटकहरूको प्रमुख रोजाइमा पर्दै आएको छ । प्राकृतिक सौन्दर्य, खुला वातावरण र नदी किनारको अनुपम दृश्यका कारण यो क्षेत्र छोटो समयमै ‘भाइरल’ बनेको हो ।
पर्यटकको ओइरो, बिदाको दिन ५ हजारसम्मको उपस्थिति हुने गरेकाे छ । पालुङटारको यो बगर चौरमा पछिल्लो समय आन्तरिक पर्यटकको ठूलो चहलपहल देखिन थालेको छ ।
हाल यहाँ सार्वजनिक बिदाका दिन दैनिक ४ देखि ५ हजार तथा अन्य सामान्य दिनहरूमा समेत ८०० देखि ९०० जनासम्म पर्यटकहरू घुम्न र रम्न आउने गरेकाे पालुङटार नगरपालिकाले जनाएकाे छ ।
पर्यटकको चाप बढेसँगै जग्गा अतिक्रमण हुन नदिन र व्यवस्थित बनाउन जनप्रतिनिधि र स्थानीयको उपस्थितिमा सीमाङ्कनकाे भएकाे हाे । वडा नं. ७ का वडाध्यक्ष अर्जुन बहादुर कुमालसहितका जनप्रतिनिधिहरू, नगरपालिकाको प्राविधिक टोली, सरोकारवाला र स्थानीयवासीको प्रत्यक्ष सहभागितामा स्थलगत नापजाँच गरी सार्वजनिक क्षेत्रको स्पष्ट सीमाङ्कन गरिएको छ ।
पूर्वाधार निर्माण र दीर्घकालीन योजनाले क्षेत्रलाई दीर्घकालीन पर्यटकीय गन्तव्यका रूपमा विकास गर्ने लक्ष्य नगरपालिकाको राखेकाे छ ।
त्यसका लागि आवश्यक पर्यटकीय पूर्वाधार निर्माण, चौरको संरक्षण र व्यवस्थापनका योजनाहरू अघि बढाउनु पर्ने नगरपालिलकाकाे दायित्व रहने छ ।
नगरपालिकाको यो कदमले सार्वजनिक सम्पत्तिको रक्षा हुनुका साथै स्थानीय स्तरमा पर्यटन प्रवर्द्धन, रोजगारी सिर्जना र आर्थिक गतिविधि विस्तारमा ठूलो योगदान पुग्ने अपेक्षा गरिएको छ ।
