एजेन्सी । रुस–युक्रेन युद्धको क्रममा रुसी ड्रोन रोमानियाको एक आवासीय भवनमा खस्दा दुई जना घाइते भएका छन् । शुक्रबार बिहान उक्त घटना भएको रोमानियाको रक्षा मन्त्रालयले पुष्टि गरेको हो ।
मन्त्रालयका अनुसार रुसले युक्रेनको सीमावर्ती क्षेत्रमा आक्रमण गरिरहेका बेला ड्रोन पूर्वी सहर गलाटीमा रहेको एक अपार्टमेन्ट भवनमा खसेको थियो। रोमानियाको आपतकालीन सेवा निकायले ड्रोनमा रहेको विस्फोटक पदार्थ पूर्ण रूपमा विस्फोट हुँदा भवनको १०औँ तलामा आगलागी भएको जनाएको छ । घटनापछि करिब ७० जनालाई सुरक्षित स्थानमा सारिएको थियो ।
सामान्य चोटपटक लागेपछि दुई जनाको उपचार गरिएको थियो । रोमानियाली अधिकारीहरूका अनुसार रुसी ड्रोनका कारण रोमानियाली नागरिक प्रत्यक्ष रूपमा घाइते भएको यो पहिलो पटक हो । यसअघि पनि रुसी ड्रोनहरू रोमानियाको सीमाभित्र बारम्बार छिरेका थिए । नेटोको सदस्य राष्ट्र रोमानियाले यस घटनालाई रुसी महासंघको गम्भीर र गैरजिम्मेवार उक्साहट भनेको छ । रोमानियाको विदेश मन्त्रालयले नेटो महासचिवलाई घटनाबारे जानकारी गराउँदै एन्टी–ड्रोन क्षमता छिटो उपलब्ध गराउन आग्रह गरेको जनाएको छ ।
ड्रोन रोमानियाली हवाई क्षेत्रमा प्रवेश गरेपछि दुईवटा एफ–१६ फाइटिङ फाल्कन लडाकु विमान परिचालन गरिएको रक्षा मन्त्रालयले जनाएको छ । ड्रोनलाई राडारमार्फत ट्र्याक गर्दै जाँदा गालाती शहरको दक्षिणी भागमा रहेको अपार्टमेन्टको छतमा खसेको र त्यसपछि आगलागी भएको मन्त्रालयले उल्लेख गरेको छ । गालाती नजिकै रहेको डेन्युब नदी रोमानिया र युक्रेनबीचको सीमा हो ।रुसले नियमित रूपमा युक्रेनका बन्दरगाहहरूमा हवाई आक्रमण गर्दै आएको छ ।
रोमानियाली रक्षा मन्त्रालयका अनुसार सन २०२२ मा भ्लादिमिर पुटिनले युक्रेनमाथि पूर्ण आक्रमण सुरु गरेयता रोमानियाली भूमिमा ४७ पटक ड्रोनका अवशेष फेला परिसकेका छन्, जसमध्ये १२ वटा घटना यस वर्षमात्र भएका हुन् । यसैबीच, युक्रेनभर हवाई आक्रमण सतर्कता जारी गरिएको छ ।
दक्षिणी ओडेसा क्षेत्रमा रहेको इज्माइल बन्दरगाहमा पनि शुक्रबार बिहान ड्रोन आक्रमण भएको स्थानीय अधिकारीहरूले बताएका छन् । उता, रुसको नियन्त्रणमा रहेको पूर्वी डोनेत्स्क क्षेत्रमा युक्रेनी ड्रोन आक्रमणमा तीन जना विद्युत् सेवा कर्मचारी मारिएको र एक जना गम्भीर घाइते भएको रुसी अधिकारीहरूले बताएका छन् ।
