एजेन्सी । भारतको उत्तर प्रदेश राज्यस्थित हमीरपुर जिल्लामा बिहीबार राति निर्माणाधीन पुल भत्किँदा ६ जना मजदुरको ज्यान गएको छ । भग्नावशेषमुनि पुरिएका अन्य ३ मजदुरलाई उद्धार गरी अस्पताल पठाइएको भारतीय सञ्चारमाध्यमहरुले जनाएका छन् ।
स्थानीय प्रशासनका अनुसार पुल निर्माण कार्य भइरहेको समयमा अचानक संरचना भत्किएको थियो । त्यतिबेला त्यहाँ काम गरिरहेका मजदुरहरू पुलको भग्नावशेषमुनि पुरिए । ज्यान गुमाउनेमध्ये २ जना हमीरपुर र ४ जना बान्डा जिल्लाका रहेका छन् ।
दुर्घटनाका बेला आँधीबेहरी आएकाे र साेही कारणले पुल भत्किएकाे हो कि ? भन्ने प्रश्नमा अतिरिक्त प्रहरी उपरीक्षक अरविन्दकुमार वर्माले घटनास्थलमै अनुसन्धान भइरहेको र जाँचपछि मात्रै वास्तविक कारण खुल्ने बताएका छन् ।
दोषी पाइए कारबाही गरिने पनि उनले बताएका छन् । अधिकारीहरूका अनुसार राहत तथा उद्धार कार्य रातभर सञ्चालन गरिएको थियो । जेसीबी मेसिनको सहायताले भग्नावशेष हटाएर मजदुरहरूलाई बाहिर निकालिएको हो । घाइतेहरूलाई नजिकका अस्पतालमा भर्ना गरिएको छ ।
दुर्घटनापछि पुल निर्माणको गुणस्तर र सुरक्षा मापदण्डबारे प्रश्न उठ्न थालेका छन् । जिल्ला प्रशासन तथा लोक निर्माण विभागका अधिकारीहरू घटनास्थल पुगेका छन् । अधिकारीहरूले घटनाबारे छानबिनका आदेश दिइसकेको बताएका छन् ।
बिहीबार राति उत्तर प्रदेशका विभिन्न क्षेत्रमा आँधीबेहरी, वर्षा र चट्याङका घटना भएका थिए । मौसम विभागले यसअघि नै खराब मौसमको चेतावनी जारी गरेको थियो ।