एजेन्सी । पाकिस्तानको उत्तरपश्चिमी प्रान्त खैबर पख्तूनख्वामा सोमबार बिहान भएको भीषण सडक दुर्घटनामा कम्तीमा ११ जनाको ज्यान गएको छ भने ७ जना घाइते भएका छन् । दुर्घटना स्वात एक्सप्रेसवेको इस्माइला इन्टरचेन्ज क्षेत्रमा भएको हो ।
उद्धार अधिकारी र मोटरवे प्रहरीका अनुसार रावलपिन्डीबाट दिरतर्फ जाँदै गरेको यात्रुवाहक भ्यानले सडक किनारमा रोकिएको यात्रुवाहक बसलाई पछाडिबाट ठक्कर दिएको थियो । ठक्कर अत्यन्त शक्तिशाली भएकाले भ्यानको अगाडिको भाग पूर्ण रूपमा क्षतिग्रस्त भएको थियो ।
प्रहरीले दिएको प्रारम्भिक जानकारीअनुसार दुर्घटना बिहान सबेरै भएको थियो । बस कराँचीबाट बुनरतर्फ यात्रु बोकेर गइरहेको थियो । केही प्राविधिक वा विश्राम सम्बन्धी कारणले बस सडक किनारमा रोकिएको अनुमान गरिएको छ । त्यसै क्रममा पछाडिबाट आएको भ्यानले बसलाई ठोक्काएको हो ।
दुर्घटना लगत्तै स्थानीय बासिन्दा, उद्धार टोली र मोटरवे प्रहरीले तत्काल उद्धार कार्य सुरु गरेका थिए । केही यात्रुहरू भ्यानभित्र च्यापिएको अवस्थामा भेटिएका थिए । उनीहरुलाई निकाल्न भ्यानलाई काटेर बाहिर निकालिएको उद्धारकर्मीहरूले बताएका छन् ।
दुर्घटनामा घटनास्थलमै धेरै यात्रुको ज्यान गएको थियो भने केहीकाे अस्पतालमा उपचारकाे क्रममा ज्यान गुमाएकाे हाे । घाइते ७ जनालाई नजिकैको अस्पतालमा उपचारका लागि भर्ना गरिएको छ । केहीको अवस्था गम्भीर रहेको बताइएको छ ।
