गाेरखा । राष्ट्रिय परीक्षा बोर्डद्वारा सञ्चालित कक्षा १२ को प्रश्नपत्र परीक्षा सुरु हुनुभन्दा अगावै सामाजिक सञ्जालमार्फत सार्वजनिक गरेको आरोपमा प्रहरीले गाेरखाका २ जना युवकलाई पक्राउ गरेको छ ।
नेपाल प्रहरीको साइबर ब्यूरो भोटाहिटीबाट खटिएको टोलीले काठमाडौँको रत्नपार्क क्षेत्रबाट उनीहरूलाई नियन्त्रणमा लिएको हो ।
पक्राउ पर्नेहरूमा गोरखाको भीमसेन थापा गाउँपालिका स्थायी घर भई हाल काठमाडौँको रानीबन बस्ने २९ वर्षीय सन्तोष बन्जारा र गोरखाकै गण्डकी गाउँपालिका घर भई हाल वनस्थली बस्ने २० वर्षीय अश्विन अधिकारी रहेका छन् ।
उनीहरूले ह्वाट्सएप र फेसबुक मेसेन्जरका विभिन्न समूहहरू सिर्जना गरी उत्तरसहितको प्रश्नपत्र बाहिर ल्याएर गोपनीयता भङ्ग गरेको प्रहरीले जनाएको छ ।
राष्ट्रिय परीक्षा बोर्डको उजुरीका आधारमा ब्यूरोले गरेको प्राविधिक विश्लेषण र अनुसन्धानबाट उनीहरूको संलग्नता खुलेको हो । पक्राउ परेका दुवै जनामाथि थप अनुसन्धान भइरहेको छ ।