गोरखा । गोरखाको नारेश्वर नजिकै रहेको ऐतिहासिक तथा पुरातात्विक बिन्ध्याबासिनी मन्दिरको भौतिक संरचना निर्माणका लागि सहयोग स्वरुप लगाएको महायज्ञमा करिब ३७ लाख रुपैयाँ संकलन भएको छ ।
चैत १७ गतेदेखी २४ गतेसम्म सञ्चालनमा आएको महायज्ञमा ३६ लाख १७ हजार १४० रुपैयाँ संकलन भएको विन्ध्याबासिनी संरक्षण मुल समिति तथ विन्ध्याबासिनी महायज्ञ मुल समारोह समितिका प्रचार प्रशार समितिका संयोजक बिमल श्रेष्ठले जानकारी दिए ।
उनका अनुसार विन्ध्याबासिनी संरक्षण मुल समिति तथ विन्ध्याबासिनी महायज्ञ मुल समारोह समितिको आयोजनामा भएको महायज्ञबाट उठेको रकमबाट मन्दिरको भौतिक संरचना निर्माणमा खर्च गरिने छ ।
गोरखा नगरपालिका–३ को कान्तेश्वारामा रहेको उक्त मन्दिर तात्कालिन राजा रामशाहको पालामा १७८३ सालमा बनेको शिलालेख उल्लेख गरिएको छ । मन्दिर पहराको ढुङ्गा मुनि रहेकोले ब्यवस्थित गर्न महायज्ञ आयोजना गरिएको हो ।
गोरखा र तनहुँमा रहेको गोरखकाली, अन्नपूर्ण, अकला, मनकामना, छिम्केश्वरी र छाब्दी बराहीको ७ दिदी बहिनी मध्ये बिन्ध्याबासिनीलाई १ दिदी बहिनीको रुपमा पुजिदै आएको छ ।
यो मन्दिरमा विशेष गरी जनै पूर्णिमा र ठूलो एकादशीको दिनमा विशेष पुजा र मेला लाग्ने गर्दछ । त्यसका साथै विन्ध्याबासिनी संग गरिएको भाकल पुरा हुने जनविश्वासका साथ यहाँ टाढा टाढादेखी भक्तजनहरु पुजाका लागि आउने गर्दछन् ।
मन्दिर पुनः निर्माणका लागि गोरखा नगरपालिका समेत डिपिआर तयार गरेको छ ।
महायज्ञमा स्थानिय उपेन्द्र बस्नेतले १ लाख १२ हजार ११२ रुपैयाँ, दयाराम कोइरालाले १ लाख ११ हजार १११ रुपैयाँ दान गरेको संयोजक श्रेष्ठले जानकारी दिए ।
त्यसका साथै अमृत कुँवरले ६६ हजार ६६६ रुपैयाँ, रमेश श्रेष्ठले ५६ हजार ६६६ रुपैयाँ, चुलबहादुर कुँवरले ५५ हजार ५५५ रुपैयाँका साथै बावुराम श्रेष्ठले ५१ हजार १५५ रुपैयाँ दान गरेको संयोजक श्रेष्ठले बताए ।
