गाेरखा । नयाँ वर्ष २०८३ को उल्लाससँगै नेपाल टेलिकमले आफ्ना ग्राहकका लागि आकर्षक ‘न्यु इयर अफर’ सार्वजनिक गरेको छ । सरकारी स्वामित्वको यस दूरसञ्चार कम्पनीले प्रिपेड तथा पोस्टपेड मोबाइल प्रयोगकर्तालाई लक्षित गर्दै विशेष डाटा प्याकेजहरू ल्याएको हो ।
कम्पनीले यसपटक ‘न्यु इयर लाइट’ र ‘न्यु इयर प्रिमियम’ गरी दुई विकल्प अगाडि सारेको छ, जसले प्रयोगकर्तालाई उच्च गतिको इन्टरनेट अनुभव दिने अपेक्षा गरिएको छ । टेलिकमका अनुसार ‘न्यु इयर लाइट’ प्याकेज अन्तर्गत ग्राहकले ४९९ रुपैयाँमा ३० दिनसम्म प्रतिदिन ५ जीबी डाटा चलाउन पाउनेछन् ।
तोकिएको दैनिक ५ जीबीको सीमा सकिए पनि इन्टरनेट काटिने छैन, बरु २ एमबीपीएसको गतिमा महिनाभर अनलिमिटेड डाटा प्रयोग गर्न सकिने सुविधा दिइएको छ । त्यसैगरी, अलि बढी डाटा खपत गर्नेहरूका लागि ‘न्यु इयर प्रिमियम’ प्याकेज ल्याइएको छ । ६९९ रुपैयाँ पर्ने यस प्याकेजमा प्रतिदिन १० जीबी डाटा उपलब्ध हुनेछ भने दैनिक सीमा सकिएपछि ३ एमबीपीएसको गतिमा अनलिमिटेड डाटा चलाउन पाइनेछ ।
यो विशेष अफर आज चैत ३० गतेदेखि सुरु भई आगामी वैशाख २ गतेसम्म मात्र खरिद गर्न सकिनेछ । ३० दिनको समयावधि रहने यी प्याकेजहरू पोस्टपेड मोबाइल प्रयोगकर्ताले खरिद गर्दा त्यसको शुल्क मासिक रेन्टल चार्जमै समावेश हुने टेलिकमले जनाएको छ । नयाँ वर्षको अवसरमा ग्राहकलाई सस्तो र गुणस्तरीय डाटा सेवा दिने उद्देश्यले यो योजना ल्याइएको कम्पनीका प्रवक्ता रवीन्द्र मानन्धरले जानकारी दिएका छन् ।
टेलिकमको यो अफर लिन इच्छुक ग्राहकले आफ्नो मोबाइलबाट *1415*11# डायल गरेर आफूलाई मन पर्ने प्याकेज छनोट गर्न सक्नेछन् । यसका साथै ‘नेपाल टेलिकम एप’ मार्फत पनि यी प्याकेजहरू सजिलै खरिद गर्न सकिने व्यवस्था मिलाइएको छ ।
