एजेन्सी । अमेरिका र इरानबिचको ऐतिहासिक शान्ति वार्ता निष्कर्षविहीन बनेकाे छ । बार्ता सकिए लगत्तै इरानले अमेरिकाको गम्भीरतामाथि प्रश्न उठाएको छ ।
इरानी विदेश मन्त्रालयका प्रवक्ता इस्माइल बाकाइले सामाजिक सञ्जालमार्फत एक विज्ञप्ति जारी गर्दै वार्ताको सफलता पूर्ण रूपमा अमेरिकी पक्षको सद्भाव र गम्भीरतामा निर्भर रहने स्पष्ट पारेका छन् ।
प्रवक्ता बाकाइले वार्तालाई ‘अत्यन्तै सघन’ भनी टिप्पणी गरे पनि वासिङ्टनले अघि सारेका मागहरूलाई ‘अत्यधिक र गैरकानुनी’ को संज्ञा दिएका छन् । उनले अमेरिकालाई आफ्ना जिद्दी र दबाबपूर्ण शैली छोडेर इरानको वैध अधिकार र राष्ट्रिय स्वार्थलाई स्वीकार गर्न आग्रह गरेका छन् । इरानले विशेषगरी आफ्नो सार्वभौमिकता र क्षेत्रीय स्वार्थमा आँच आउने कुनै पनि सर्त नमान्ने संकेत दिएको छ ।
जारी वार्तामा मुख्यगरी ३ वटा एजेन्डामा छलफल भइरहेको बाकाइले जानकारी दिएका छन् । जसमा विश्व ऊर्जा आपूर्तिको लाइफलाइन मानिने स्ट्रेट अफ होर्मुजको भविष्य, इरानको आणविक कार्यक्रमको स्वरूप र इरानमा भइरहेको युद्धको पूर्ण अन्त्य रहेका छन् ।
यी विषयमा दुवै देशका अडान निकै टाढा रहेकाले सहमति जुटाउन कठिन भइरहेको बुझिएको छ ।
लगातार २१ घण्टासम्म चलेको छलफलपछि अमेरिकी प्रतिनिधिमण्डलले इरान आफ्ना सर्तहरूमा सहमत हुन नसकेको भन्दै वार्ता निष्कर्षविहीन भएको घोषणा गरेको छ ।
वार्तापछि सञ्चारकर्मीहरूलाई सम्बोधन गर्दै अमेरिकी उपराष्ट्रपति जेडी भान्सले अमेरिकाले आफ्नो ‘रेड लाइन’ प्रस्ट पारेको तर इरानले त्यसलाई स्वीकार नगरेको बताए । उनले भने, ‘हामीले निकै लामो समय खर्चिएर लचिलो बन्ने प्रयास गर्यौँ, तर इरानी पक्ष हाम्रा सर्तहरू मान्न तयार भएन ।’
भान्सले अमेरिकाले इरानसमक्ष आफ्नो ‘अन्तिम र उत्कृष्ट’ प्रस्ताव राखेको र अब त्यसलाई स्वीकार गर्ने वा नगर्ने जिम्मा इरानकै हातमा रहेको उल्लेख गरे ।
उपराष्ट्रपति भान्सले इरानको आणविक कार्यक्रमलाई पूर्ण रूपमा रोक्नु नै ट्रम्प प्रशासनको मुख्य लक्ष्य रहेको दोहोर्याए । इरानको आणविक क्षमता ध्वस्त पारिएको दाबी गर्दै उनले भविष्यमा इरानले कहिल्यै परमाणु हतियार नबनाउने प्रतिबद्धता नजनाएसम्म सम्झौता हुन नसक्ने प्रस्ट पारे । अमेरिकी प्रतिनिधिमण्डल अहिले पाकिस्तानबाट फर्किने तयारीमा छ ।
दुवै पक्ष आ-आफ्नो अडानमा अडिग रहेपछि मध्यपूर्वको तनाव अन्त्य गर्ने यो ठुलो प्रयास अहिलेलाई असफल साबित भएको छ ।