एजेन्सी । भारतको मध्य प्रदेशस्थित अनूपपुर जिल्लामा शनिबार साँझ एउटा ठूलाे घर भत्किएकाे छ । अनूपपुरको कोतमा बसपार्क नजिकै रहेको अग्रवाल लजको भवन अचानक भत्किँदा १ जनाको ज्यान गएको छ भने धेरै मानिसहरू भग्नावशेषमा पुरिएको आशङ्का गरिएको छ ।
प्रशासनका अनुसार शनिबार साँझ करिब ५ः३० बजे उक्त भवन ढलेको थियो । भवन भत्किँदा आसपासका केही पसलहरूमा समेत क्षति पुगेको छ । घटनास्थलबाट हालसम्म १ जनाको शव निकालिएको छ भने केही घाइतेहरूलाई उद्धार गरी अस्पताल भर्ना गरिएको छ । अस्पताल लगिएकामध्ये केहीको अवस्था गम्भीर रहेको बताइएको छ ।
मध्य प्रदेशका मुख्यमन्त्री मोहन यादवले सामाजिक सञ्जाल एक्स मार्फत घटनाप्रति गहिरो दुःख व्यक्त गरेका छन् । उनले लेखेका छन, ‘अनूपपुर जिल्लाको कोतमा नगरपालिका क्षेत्रमा होटलको भवन भत्किएको घटना दुखद छ । एक नागरिकको मृत्यु हुनु पीडादायी छ। उद्धारका लागि एनडीआरएफको टोली घटनास्थलतर्फ प्रस्थान गरिसकेको छ। ’ मुख्यमन्त्रीले हालसम्म तीन जनालाई सुरक्षित बाहिर निकालिएको जानकारी समेत दिएका छन् ।
अनूपपुरका प्रहरी उपरीक्षक (एसपी) मोती उर रहमानले साँझ करिब ६ बजे घटनाको सूचना प्राप्त भएको र तुरुन्तै उद्धार टोली परिचालन गरिएको बताए । हाल घटनास्थलमा एनडीआरएफ, एसडीआरएफ, प्रहरी र सीआईएसएफका करिब १०० जनाको टोली उद्धार कार्यमा खटिएका छन्। मलबे हटाउन जेसीबी र क्रेनको प्रयोग भइरहेको छ भने घटनास्थलमा एम्बुलेन्सहरू तयारी अवस्थामा राखिएका छन्।
भग्नावशेषभित्र अझै केही मानिसहरू दबिएको हुनसक्ने आशङ्कामा तीव्रताका साथ खोजी तथा उद्धार कार्य जारी राखिएको प्रशासनले जनाएको छ ।
