गाेरखा । पोखराको फेवाताल किनारमा रहेका अस्थायी संरचनामा डोजर लगाएर हटाइएको छ । गृह मन्त्रालयको निर्देशन अनुसार मापदण्ड विपरीतका संरचनाहरु शनिबार बिहानैदेखि तालको ६५ मिटर भित्र पर्ने अस्थायी संरचना भत्काउन थालिएको हो ।
सर्वाधिक चासोमा रहेको चर्चित वाटर फ्रन्ट रिसोर्टको स्विमिङ पुल, गेट र पर्खालहरू पनि भत्काइएकाे छ । बिहान ४:३० बजेदेखि नै प्रहरी परिचालन गरेर भत्काउन थालिएको थियाे ।
जिल्ला प्रहरी कार्यालय, बैदाम प्रहरी, नगर प्रहरी र सशस्त्र गरी करिब २०० प्रहरीहरु परिचालन गरिएकाे थियो । संरचना भत्काउन कुनै ठुलो अवरोध नभए पनि केही स्थानीयले सामान्य असहमति भने जनाएका छन् ।
यता पाेखरा महानगरका मेयर धनराज आचार्यका अनुसार अहिले हटाइएका सबै संरचना अस्थायी हुन । उनले संरचना हटाएपनि मुआब्जा पाउनुपर्ने जग्गाधनीलाई समस्या नहुने बताए ।
पोखरा महानगरले पनि बेलाबेलामा यसैगरी डोजर चलाउने गरेको थियो । पछिल्लो समय सर्वोच्चको आदेशपछि प्रदेश सरकारसँगको समन्वयमा ताल किनारमा पोल गाड्ने काम सकिएको छ ।
अहिले ६५ मिटरको सीमाना छुट्याउने काम चलिरहेको छ । बुधबार पोखरा महानगरले हालसम्म भएको प्रगति विवरण प्रधानमन्त्री कार्यालयलाई बुझाएको थियो ।