गाेरखा । टिकटकर तुलसा अधिकारी विरुद्ध आपराधिक लाभ, ठगी र सम्पत्ति शुद्धीकरणको आरोपमा ललितपुर जिल्ला अदालतमा मुद्दा दायर गरिएको छ ।
जिल्ला सरकारी वकिल कार्यालय, ललितपुरले अधिकारीले ६ करोड ५२ लाख २९ हजार ७५ रुपैयाँ ठगी गरेको कसुरमा मुद्दा दायर गरेको हो ।
ललितपुरका व्यवसायी कुमार चिमोरियालाई हनी ट्रयापमा पारेर ४ कराेड ५० लाख रुपैयाँभन्दा बढी रकम असुलेको अभियोगमा १० जनाविरुद्ध ललितपुर जिल्ला अदालतमा मुद्दा दायर भएको छ । यस मुद्दाकी प्रतिवादी २८ वर्षीया निलिका (नेलिका) लामिछानेलाई प्रहरीले पक्राउ गरी साधारण जमानतमा रिहा गरिसकेको छ ।
उनीबाहेक अन्य ९ जनाहरु मुकेश कुमार धानुका, दिल कुमारी लिम्बु, अशोक कुमार अग्रवाल, सपना वली, मेघनाथ बस्याल, कानो मामा भन्ने प्रयास पोखरेल, गंगा अधिकारी सुवेदी, तुल्सा कलेक्सन प्रालि र एक फरार प्रतिवादीमाथि पनि कारबाहीको माग गरिएको छ ।
प्रहरीको अनुसन्धानले तुलसीले भारत लगायतका देशमा पुगी सुरेन्द्र भक्त सुवाल, रविन श्रेष्ठ, बल बहादुर राउत क्षेत्री लगायतका व्यक्तिको बैंक खातामा रकम जम्मा गर्न लगाई ती रकमहरू हुन्डीमार्फत चीनमा पुर्याउने गरेको भेटिएको छ ।
मुद्दाका मुख्य योजनाकार मानिएकी तुलसी अधिकारी हाल चीनमा रहेको र अन्य अधिकांश प्रतिवादीहरू फरार छन् । उनीहरूले अवैध रूपमा आर्जन गरेको रकमबाट वैदेशिक भ्रमण, महँगा सामान खरिद र व्यवसायमा लगानी गरेको देखिएकाले सम्पत्ति शुद्धीकरण (मनी लाउन्डरिङ्ग) निवारण ऐनबमोजिम समेत कारबाहीको माग गरिएको छ ।
अधिकारी विरुद्ध सम्पत्ति शुद्धीकरणको बिगो भने २१ करोड १२ लाख २० हजार ४०६ रुपैयाँ १६ पैसा कायम गरिएको छ ।